QUE É VIVIRMOS ESPERTOS?
Xesús non se dedicou a explicar unha doutrina relixiosa para que os seus discípulos a aprendesen correctamente e a difundisen logo por todas partes. Non era este o seu obxectivo. El faláballes dun «acontecemento» que xa estaba a suceder: «Deus estase a introducir no mundo. Quere que as cousas cambien. Só busca que a vida sexa máis digna e feliz para todos».
Xesús chamáballe a isto o «reino de Deus». Temos de estar moi atentos á súa vinda. Temos de vivirmos espertos: abrirmmos ben os ollos do corazón; desexarmos ardentemente que o mundo cambie; crermos nesta boa noticia que tarda tanto en facerse realidade plena; cambiarmos de xeitos de pensar e de actuar; vivirmos buscando e acollendo o «reino de Deus».
Non é estraño que ao longo do evanxeo escoitemos tantas veces a súa chamada insistente: «vixiade», «estade atentos á súa vinda», «vivide espertos». Esa é a primeira actitude de quen decide vivir a vida como a viviu Xesús. E é o primeiro que temos de coidar para seguirmos os seus pasos.
«Vivirmos espertos» significa non caer no escepticismo nin na indiferenza ante a marcha do mundo. Non deixarmos que o noso corazón se endureza. Non quedármonos só en queixas, críticas e condenas. Espertarmos activamente á esperanza.
«Vivirmos espertos» significa vivirmos de xeito máis lúcido, sen deixármonos arrastrar pola insensatez que ás veces parece invadilo todo. Atrevérmonos a ser diferentes. Non deixarmos que se apague en nós o desexo de buscar o ben para todos.
«Vivirmos espertos» significa vivirmos con paixón a pequena aventura de cada día. Non desentendérmonos de quen nos necesita. Seguir facendo eses «pequenos xestos» que aparentemente non serven para nada, pero que sosteñen a esperanza das persoas e fan a vida un pouco máis amábel.
«Vivirmos espertos» significa espertar a nosa fe. Buscarmos a Deus na vida e desde a vida. Intuílo moi preto de cada persoa. Descubrilo atraéndonos a todos cara á felicidade. Vivirmos non só dos nosos pequenos proxectos, senón atentos ao proxecto de Deus.
José Antonio Pagola
Tradutor: Xaquin Campo Freire
