ESCOITAR SÓ A XESÚS
A escena é considerada tradicionalmente como «a transfiguración de Xesús». Non é posíbel reconstruír con certeza a experiencia que deu orixe a este sorprendente relato, só sabemos que os evanxelistas lle dan grande importancia pois, segundo o seu relato, é unha experiencia que deixa entrever algo da verdadeira identidade de Xesús.
Nun primeiro momento, o relato destaca a transformación do seu rostro e, aínda que veñen conversar con el Moisés e Elías, talvez como representantes da lei e os profetas respectivamente, só o rostro de Xesús permanece transfigurado e resplandecente no centro da escena.
Ao parecer, os discípulos non captan o contido profundo do que están a vivir, xa que Pedro lle di a Xesús: «Mestre, que ben se está aquí. Faremos tres tendas: unha para ti, outra para Moisés e outra para Elías». Coloca a Xesús no mesmo plano e ao mesmo nivel do que aos dous grandes personaxes bíblicos. Para cadanseu a súa tenda. Xesús aínda non ocupa un lugar central e absoluto no seu corazón.
A voz de Deus vaino corrixir, revelando a verdadeira identidade de Xesús: «Este é o meu Fillo, o escolleito», o que ten o rostro transfigurado. Non ha ser confundido cos de Moisés ou Elías, que están apagados. «Escoitádeo a el». A ninguén máis. A súa Palabra é a única decisiva. As demais hannos levar ata el.
É urxente recuperarmos na Igrexa actual a importancia decisiva que tivo nos seus comezos a experiencia de escoitaren no seo das comunidades cristiás o relato de Xesús recolleito nos evanxeos. Estes catro escritos constitúen para os cristiáns unha obra única que non podemos equiparar ao resto dos libros bíblicos.
Hai algo que só neles podemos atopar: o impacto causado por Xesús aos primeiros que se sentiron atraídos por el e o seguiron. Os evanxeos non son libros didácticos que expoñen doutrina académica sobre Xesús. Tampouco biografías redactadas para informaren con detalle sobre a súa traxectoria histórica. Son «relatos de conversión» que invitan ao cambio, ao seguimento de Xesús e á identificación co seu proxecto.
Por iso piden ser escoitados en actitude de conversión. E nesa actitude teñen de ser lidos, predicados, meditados e gardados no corazón de cada crente e de cada comunidade. Unha comunidade cristiá que sabe escoitar cada domingo o relato evanxélico de Xesús en actitude de conversión, comeza a transformarse. Non ten a Igrexa un potencial máis vigoroso de renovación que o que se encerra nestes catro pequenos libros.
José Antonio Pagola
Tradutor: Xaquin Campo Freire
