CO LUME DO ESPÍRITO
As primeiras comunidades cristiás preocupáronse por diferenciaren ben o bautismo de Xoán, que mergullaba as xentes nas augas do Xordán, e o bautismo de Xesús, que comunicaba o seu Espírito para limpar, renovar e transformar o corazón dos seus seguidores. Sen ese Espírito de Xesús, a Igrexa apágase e extínguese.
Só o Espírito de Xesús pode poñer máis verdade no cristianismo actual. Só o seu Espírito nos pode conducir a recuperarmos a nosa verdadeira identidade, abandonando camiños que nos desvían unha e outra vez do Evanxeo. Só ese Espírito nos pode dar luz e forza para emprendermos a renovación que necesita hoxe a Igrexa.
O papa Francisco sabe moi ben que o maior obstáculo para pór en marcha unha nova etapa evanxelizadora é o da mediocridade espiritual. Dío de xeito rotundo. Desexa alentar con todas as súas forzas unha etapa «máis ardente, alegre, xenerosa, audaz, chea de amor ata o fin, e de vida contaxiosa». Pero todo será insuficiente «se non arde nos corazóns o lume do Espírito».
Por iso busca para a Igrexa de hoxe «evanxelizadores con Espírito» que se abran sen medo á súa acción e atopen nese Espírito Santo de Xesús «a forza para anunciaren a verdade do Evanxeo con audacia, en voz alta e en todo tempo e lugar, ata a contracorrente».
Segundo o papa, a renovación que quere impulsar no cristianismo actual non é posíbel «cando a falta dunha espiritualidade profunda se traduce en pesimismo, fatalismo e desconfianza», ou cando nos leva a pensarmos que «nada pode cambiar» e, xa que logo, que «é inútil esforzarse», ou cando baixamos os brazos definitivamente, «dominados por un descontento crónico ou por unha acedía que seca a alma».
Francisco advírtenos que «ás veces perdemos o entusiasmo ao esquecermos que o Evanxeo responde ás necesidades máis profundas das persoas». Con todo non é así. O papa expresa con forza a súa convición: «Non é o mesmo coñecer a Xesús que non coñecelo, non é o mesmo camiñar con el do que camiñar ás apalpadelas, non é o mesmo poder escoitalo ca ignorar a súa Palabra […] non é o mesmo tratar de construír o mundo co seu Evanxeo que facelo só coa propia razón».
Todo isto temos de descubrilo na experiencia persoal de Xesús. Pola contra, di o papa, a quen non o descobre, «axiña lle falta forza e paixón; unha persoa que non está convencida, entusiasmada, segura, namorada, non convence a ninguén». Non estará aquí un dos principais obstáculos para impulsar a renovación querida polo papa Francisco?
José Antonio Pagola
Tradutor: Xaquin Campo Freire
