ARRISCAR TODO
POR XESÚS
Non é fácil asomarse ao mundo interior de Xesús, pero no seu corazón podemos intuír unha experiencia dupla: a súa identificación cos últimos e a súa confianza total no Pai. Por unha banda sofre coa inxustiza, as desgrazas e as enfermidades que fan sufrir a tantos. Por outra confía totalmente nese Deus Pai que nada hai que máis queira que arrincar da vida o que é malo e fai sufrir aos seus fillos.
Xesús estaba disposto a todo con tal de facer realidade o desexo de Deus, o seu Pai: un mundo máis xusto, digno e ditoso para todos. E, como é natural, quería atopar entre os seus seguidores a mesma actitude. Se seguían os seus pasos, debían compartir a súa paixón por Deus e a súa dispoñibilidade total ao servizo do seu reino. Quería acender neles o lume que levaba dentro.
Hai frases que o din todo. As fontes cristiás conservaron, con pequenas diferenzas, unha expresión dirixida por Xesús aos seus discípulos: E se un quere salvar a súa vida, perderaa, pero o que a perda por min, atoparaa». Con estas palabras tan paradoxais, Xesús está a convidalos a viviren coma el: agarrarse cegamente á vida pode levar a perdela; arriscala de maneira xenerosa e valente leva a salvala.
O pensamento de Xesús é claro. O que camiña tras del, pero segue aferrado ás seguridades, metas e expectativas que lle ofrece a súa vida, pode terminar perdendo o maior ben de todos: a vida vivida segundo o proxecto salvador de Deus. Pola contra, o que o arrisca todo por seguilo atopará vida entrando con el no reino do Pai.
Quen segue a Xesús ten con frecuencia a sensación de estar «a perder a vida» por unha utopía inalcanzábel: Non estamos a botar a perder os nosos mellores anos soñando con Xesús? Non estamos a gastar as nosas mellores enerxías por unha causa inútil?
Que facía Xesús cando se vía turbado por este tipo de pensamentos escuros? Identificarse aínda máis cos que sofren e seguir confiando nese Pai que pode regalarnos unha vida que non pode deducirse do que experimentamos aquí na terra.
José Antonio Pagola
Tradutor: Xaquin Campo Freire
