A PRIMEIRA PALABRA DE XESÚS
O evanxelista Mateu coida moito o escenario no que vai facer Xesús na súa aparición pública. Apágase a voz do Bautista e empézase a escoitar a voz nova de Xesús. Desaparece a paisaxe seca e sombría do deserto e ocupa o centro o verdor e a beleza de Galilea. Xesús abandona Nazaret e desprázase a Cafarnaún, á ribeira do lago. Todo suxire a aparición dunha vida nova.
Mateu recorda que estamos na «Galilea dos xentís». Xa sabe que Xesús predicou nas sinagogas xudías daquelas aldeas e non se moveu entre pagáns. Pero Galilea é cruzamento de camiños; Cafarnaún, unha cidade aberta ao mar. Desde aquí chegará a salvación a todos os pobos.
De momento, a situación é tráxica. Inspirándose nun texto do profeta Isaías, Mateu ve que «o pobo habita en tebras». Sobre a terra «hai sombras de morte». Reina a inxustiza e o mal. A vida non pode crecer. As cousas non son como as quere Deus. Aquí non reina o Pai.
Con todo, no medio das tebras, o pobo vai empezar a ver «unha luz grande». Entre as sombras de morte «empeza a brillar unha luz». Iso é sempre Xesús: unha luz grande que brilla no mundo.
Segundo Mateu, Xesús comeza a súa predicación cun grito: «Convertédevos». Esta é a súa primeira palabra. É a hora da conversión. Hai que abrirse ao reino de Deus. Non ficar «sentados nas tebras», senón «camiñar na luz».
Dentro da Igrexa hai unha «grande luz». É Xesús. Deus revélasenos nel. Non o habemos ocultar co noso protagonismo. Non o habemos suplantar con nada. Non o habemos converter en doutrina teórica, en teoloxía fría ou en palabra aburrida. Se a luz de Xesús se apaga, os cristiáns converterémonos no que tanto temía Xesús: «uns cegos que tratan de guiar a outros cegos».
Por iso tamén hoxe esa é a primeira palabra que habemos escoitar: «Convertédevos»; recuperade a vosa identidade cristiá; volvede ás vosas raíces; axudade á Igrexa a pasar a unha nova etapa de cristianismo máis fiel a Xesús; vivide con nova conciencia de seguidores; poñédevos ao servizo do reino de Deus.
José Antonio Pagola
Tradutor: Xaquin Campo Freire
