O PROXECTO DO REINO DE DEUS
Escribíronse obras moi importantes para definir onde está a «esencia do cristianismo». E porén, para coñecermos o centro da fe cristiá non temos de acudirmos a ningunha teoría teolóxica. O primeiro é captar cal foi para Xesús o seu obxectivo, o centro da súa vida, a causa á que se dedicou en corpo e alma.
Ninguén dubida hoxe de que o evanxeo de Marcos soubo resumilo acertadamente con estas palabras: «O reino de Deus está cerca. Convertédevos e crede esta Boa Noticia». O obxectivo de Xesús foi introducir no mundo o que el chamaba «o reino de Deus»: unha sociedade estruturada de xeito xusto e digna para todos, tal como quere Deus.
Cando Deus reina no mundo, a humanidade progresa en xustiza, solidariedade, compaixón, fraternidade e paz. A isto dedicouse Xesús con verdadeira paixón. Por iso foi perseguido, torturado e executado. «O reino de Deus» foi o absoluto para el.
A conclusión é evidente: a forza, o motor, o obxectivo, a razón e o sentido último do cristianismo é «o reino de Deus». Non outra cousa. O criterio para medir a identidade dos cristiáns, a verdade dunha espiritualidade ou a autenticidade do que fai a Igrexa é sempre: «o reino de Deus». Un reino que comeza aquí e alcanza a súa plenitude na vida eterna.
O único xeito de mirar a vida como a miraba Xesús, a única forma de sentir as cousas como as sentía el, o único modo de actuar como el actuaba, é orientarmos a vida de cara a construírmos un mundo máis humano. Con todo, moitos cristiáns non oíron falar así, dese xeito, do «reino de Deus». E non poucos teólogos habemos ter que ir descubríndoo aos poucos ao longo da nosa vida.
Unha das «herexías» máis graves que se foi e vai ir introducindo no cristianismo é facermos da Igrexa o absoluto. Pensar que a Igrexa é o central, a realidade ante a cal todo o demais ha de quedar subordinado; facer da Igrexa o «sustitutivo» do reino de Deus; traballarmos pola Igrexa e preocuparnos dos seus problemas, esquecendo o sufrimento que hai no mundo e loitar por unha organización máis xusta da vida.
Non é doado manter un cristianismo orientado segundo o reino de Deus, pero, cando se traballa nesa dirección, a fe transfórmase, faise máis creativa e, sobre todo, máis evanxélica e humana.
José Antonio Pagola
Tradutor: Xaquin Campo Freire
