PODO CAMBIAR?
Lucas narra o episodio de Zaqueo para que os seus lectores descubran mellor o que poden esperar de Xesús: o Señor ao que invocan e seguen nas comunidades cristiás «veu buscar e salvar o que estaba perdido». Non o teñen de esquecer.
Ao mesmo tempo, o seu relato da actuación de Zaqueo axuda a responder á pregunta que non poucos levan no seu interior: Aínda podo cambiar? Non é xa demasiado tarde para refacer unha vida que, en boa parte, botei a perder? Que pasos podo dar?
Zaqueo é descrito con dous trazos que definen con precisión a súa vida. É «xefe de publicanos» e é «rico». En Xericó todos saben que é un pecador. Un home que non serve a Deus senón ao diñeiro. A súa vida, como tantas outras, é pouco humana.
Con todo, Zaqueo «busca ver a Xesús». Non é mera curiosidade. Quere saber quen é, que se encerra neste Profeta que tanto atrae á xente. Non é tarefa fácil para un home instalado no seu mundo. Pero este desexo de Xesús vai cambiar a súa vida.
O home terá que superar diferentes obstáculos. É «baixo de estatura», sobre todo porque a súa vida non está motivada por ideais moi nobres. Outro impedimento é a xente: terá que superar prexuízos sociais que lle fan difícil o encontro persoal e responsábel con Xesús.
Pero Zaqueo prosegue na súa procura con sinxeleza e sinceridade. Corre para adiantar ao xentío e sobe a unha árbore coma un neno. Non pensa na súa dignidade de home importante. Só quere atopar o momento e o lugar adecuado para entrar en contacto con Xesús. Quéreo ver.
Daquela é cando descobre que tamén Xesús o está buscando a el pois chega ata aquel lugar, búscao coa mirada e dille: «O encontro será hoxe mesmo na túa casa de pecador». Zaqueo baixa e recíbeo na súa casa cheo de alegría. Hai momentos decisivos nos que Xesús pasa pola nosa vida porque quere salvar o que nós estamos botando a perder. Non os podemos deixar escapar.
Lucas non describe o encontro. Só fala da transformación de Zaqueo. Cambia o seu xeito de mirar a vida: xa non pensa só no seu diñeiro senón no sufrimento dos demais. Cambia o seu estilo de vida: fará xustiza aos que explotou e compartirá os seus bens cos pobres.
Tarde ou cedo, todos corremos o risco de «instalarnos» na vida renunciando a calquera aspiración de vivirmos con máis calidade humana. Os crentes habemos saber que un encontro máis auténtico con Xesús pode facer a nosa vida máis humana e, sobre todo, máis solidaria.
José Antonio Pagola
Tradutor: Xaquin Campo Freire
