UN ANUNCIO SORPRENDENTE
Lucas narra o anuncio do nacemento de Xesús nun estreito paralelismo co do Bautista. O contraste entre ambas escenas é tan sorprendente que nos permite entrevermos con luces novas o Misterio do Deus encarnado en Xesús.
O anuncio do nacemento do Bautista sucede en «Xerusalén», a grandiosa capital de Israel, centro político e relixioso do pobo xudeu. O nacemento de Xesús anúnciase nun pobo descoñecido das montañas de Galilea, unha aldea sen relevo algún, chamada «Nazaret», de onde ninguén espera que poida saír nada bo.
Anos máis tarde, estes pobos humildes acollerán a mensaxe de Xesús anunciando a bondade de Deus. Xerusalén pola contra rexeitarao. Case sempre, son os pequenos e insignificantes os que mellor entenden e acollen ao Deus encarnado en Xesús.
O anuncio do nacemento do Bautista ten lugar no espazo sagrado do «templo». O de Xesús nunha casa pobre dunha «aldea». Xesús farase presente alí onde as xentes viven, traballan, gozan e sofren. Vive entre eles aliviando o sufrimento e ofrecendo o perdón do Pai. Deus fíxose carne, non para permanecer nos templos, senón para «poñer a súa morada entre os homes» e compartir a nosa vida.
O anuncio do nacemento do Bautista escóitao un «varón» venerábel, o sacerdote Zacarías, durante unha solemne celebración ritual. O de Xesús, fáiselle a María, unha «moza» duns doce anos. Non se indica onde está nin que está a facer. A quen pode interesarlle o traballo dunha muller? Con todo, Xesús, o Fillo de Deus encarnado, mirará ás mulleres de xeito diferente, defenderá a súa dignidade e acolleraas entre os seus discípulos.
Para rematar, do Bautista anúnciase que nacerá de Zacarías e Isabel, unha parella estéril, bendicida por Deus. De Xesús dise algo absolutamente novo. O Mesías nacerá de María, unha moza virxe. O Espírito de Deus estará na orixe da súa aparición no mundo. Por iso, «será chamado Fillo de Deus». O Salvador do mundo non nace como froito do amor duns esposos que se queren mutuamente. Nace como froito do Amor de Deus a toda a humanidade. Xesús non é un agasallo que nos fan María e Xosé. É un agasallo que nos fai Deus.
José Antonio Pagola
Tradutor: Xaquin Campo Freire
