SEGUIDORA FIEL DE XESÚS
Os evanxelistas presentan á Virxe con trazos que poden reavivar a nosa devoción a María, a Nai de Xesús. A súa visión axúdanos a amala, meditala, imitala, rezala e confiar nela con espírito novo e máis evanxélico.
María é a grande crente. A primeira seguidora de Xesús. A muller que sabe meditar no seu corazón os feitos e as palabras do seu Fillo. A profetisa que canta ao Deus, salvador dos pobres, anunciado por el. A nai fiel que permanece xunto ao seu Fillo perseguido, condenado e executado na cruz. Testemuña de Cristo resucitado, que acolle xunto aos discípulos ao Espírito que acompañará sempre á Igrexa de Xesús.
Lucas, pola súa banda, invítanos a facer noso o canto de María, para deixarnos guiar polo seu espírito cara a Xesús, pois no «Magníficat» brilla en todo o seu esplendor a fe de María e a súa identificación maternal co seu Fillo Xesús.
María comeza proclamando a grandeza de Deus: «o meu espírito alégrase en Deus, o meu salvador, porque mirou a humillación da súa escrava». María é feliz porque Deus puxo a súa mirada na súa pequenez. Así é Deus cos sinxelos. María cántao co mesmo gozo con que bendí Xesús ao Pai, porque se oculta a «sabios e entendidos» e revélase a «os sinxelos». A fe de María no Deus dos pequenos fainos sintonizar con Xesús.
María proclama ao Deus «Poderoso» porque «a súa misericordia chega aos seus fieis de xeración en xeración». Deus pon o seu poder ao servizo da compaixón. A súa misericordia acompaña todas as xeracións. O mesmo predica Xesús: Deus é misericordioso con todos. Por iso di aos seus discípulos de todos os tempos: «sede misericordiosos como o voso Pai é misericordioso». Desde o seu corazón de nai, María capta como ninguén a tenrura de Deus Pai e Nai, e introdúcenos no núcleo da mensaxe de Xesús: Deus é amor compasivo.
María proclama tamén ao Deus dos pobres porque «derruba do trono aos poderosos» e déixaos sen poder para seguiren oprimindo; pola contra, «enaltece aos humildes» para que recobren a súa dignidade. Aos ricos reclámalles o roubado aos pobres e «despídeos baleiros»; pola contra, aos famentos «cólmaos de bens» para que gocen dunha vida máis humana. O mesmo gritaba Xesús: «os últimos serán os primeiros». María lévanos a acollermos a Boa Noticia de Xesús: Deus é dos pobres.
María ensínanos como ninguén a seguirmos a Xesús, anunciando ao Deus da compaixón, traballando por un mundo máis fraterno e confiando no Pai dos pequenos.
José Antonio Pagola
Tradutor: Xaquin Campo Freire
