UNHA NOVA ETAPA
Antes de narrar a súa actividade profética, os evanxelistas fálannos dunha experiencia que vai transformar radicalmente a vida de Xesús. Logo de ser bautizado por Xoán, Xesús séntese o Fillo querido de Deus, habitado plenamente polo seu Espírito. Alentado por ese Espírito, Xesús ponse en marcha para anunciar a todos coa súa vida e a súa mensaxe a Boa Noticia dun Deus amigo e salvador do ser humano.
Non é estraño que, ao invitarnos a vivir nos próximos anos «unha nova etapa evanxelizadora», o papa nos recorda que a Igrexa necesita máis do que nunca «evanxelizadores de Espírito». Sabe moi ben que só o Espírito de Xesús nos pode infundir forza para pór en marcha a conversión radical que necesita a Igrexa. Por que camiños?
Esta renovación da Igrexa só pode nacer da novidade do Evanxeo. O papa invítanos a escoitarmos tamén hoxe a mesma mensaxe que Xesús proclamaba polos camiños de Galilea e non outra diferente. Temos de «volver á fonte para recuperarmos a frescura orixinal do Evanxeo». Só deste xeito «poderemos romper esquemas aburridos nos que pretendemos encerrar a Xesús Cristo».
O papa está pensando nunha renovación radical «que non pode deixar as cousas como están; non serve xa unha simple administración». Por iso nos pide abandonar o cómodo criterio pastoral do «sempre se fixo así» e insiste unha e outra vez: «Invito a todos a ser audaces e creativos nesta tarefa de repensar os obxectivos, as estruturas, o estilo e os métodos evanxelizadores das propias comunidades».
Francisco busca unha Igrexa na que só nos preocupe comunicar a Boa Noticia de Xesús ao mundo actual. «Máis que o temor a non equivocarnos espero que nos mova o temor a encerrarnos en estruturas que nos dan unha falsa contención, en normas que fan de nós xuíces implacábeis, en costumes onde nos sentimos tranquilos, mentres fóra hai unha multitude famenta. E Xesús repítenos sen cansarse: Dádelles vós para comeren».
O papa chámanos a construírmos «unha Igrexa coas portas abertas», pois a alegría do Evanxeo é para todos e non se debe excluír a ninguén. Que ledicia poder escoitar dos seus beizos unha visión de Igrexa que recupera o Espírito máis xenuíno de Xesús rompendo actitudes moi arraigadas durante séculos! «A miúdo nos comportamos coma controladores da graza e non como facilitadores. Pero a Igrexa non é unha aduana. É a casa do Pai, onde hai lugar para cada un coa súa vida ás costas».
José Antonio Pagola
Tradutor: Xaquin Campo Freire
