CON XESÚS
COMEZA ALGO BO
Ao longo deste novo ano litúrxico, os cristiáns iremos lendo nos domingos o Evanxeo de Marcos. O seu pequeno escrito arrinca con este título: «Comezo da boa noticia de Xesús, o Mesías, Fillo de Deus». Estas palabras permítennos evocarmos algo do que atoparemos no seu relato.
Con Xesús «comeza algo novo». É o primeiro que quere deixar ben claro Marcos. Todo o anterior pertence ao pasado. Xesús é o comezo de algo novo e inconfundíbel. No relato, Xesús dirá: «cumpriuse o tempo ». Con el chega a boa noticia de Deus.
Isto é o que están experimentando os primeiros cristiáns. Quen se encontra vitalmente con Xesús e penetra un pouco no seu misterio sabe que con el empeza unha vida nova, algo que nunca experimentara anteriormente.
O que atopan en Xesús é unha «Boa Noticia». Algo novo e bo. A palabra «Evanxeo» que emprega Marcos é moi frecuente entre os primeiros seguidores de Xesús e expresa o que senten ao encontrárense con el. Unha sensación de liberación, alegría, seguridade e desaparición dos medos. En Xesús encontran «a salvación de Deus».
Cando alguén descobre en Xesús ao Deus amigo do ser humano, ao Pai de todos os pobos, ao defensor dos últimos, á esperanza dos perdidos, sabe que non atopará unha noticia mellor. Cando coñece o proxecto de Xesús: traballar por un mundo máis humano, digno e ditoso, sabe que non poderá dedicarse a nada máis grande.
Esta Boa Noticia é o mesmo Xesús, o protagonista do relato que vai escribir Marcos. Por iso a súa intención primeira non é ofrecernos unha doutrina sobre Xesús nin aportarnos información biográfica sobre el, senón seducirnos para que nos abramos á Boa Noticia que só poderemos atopar nel.
Marcos atribúelle a Xesús dous títulos: un tipicamente xudeu; e o outro, máis universal. Con todo, reserva aos lectores algunhas sorpresas. Xesús é o «Mesías» a quen os xudeus esperaban como liberador do seu pobo. Pero un Mesías moi diferente do líder guerreiro que moitos anhelaban para destruíren aos romanos. No seu relato, Xesús é descrito como enviado por Deus para humanizar a vida e encamiñar a historia cara á súa salvación definitiva. É a primeira sorpresa.
Xesús é «Fillo de Deus», pero non dotado do poder e a gloria que algúns imaxinaran. Un Fillo de Deus profundamente humano, tan humano que só Deus pode ser así. Só cando termine a súa vida de servizo a todos, executado nunha cruz, un centurión romano confesará: «Verdadeiramente este home era Fillo de Deus». Esa é a segunda sorpresa.
José Antonio Pagola
Tradutor: Xaquin Campo Freire
