LIBERAR
A FORZA
DO EVANXEO
Este relato da «transfiguración de Xesús» foi desde o comezo moi popular entre os seus seguidores. Non é un episodio máis. A escena, recreada con diversos recursos de carácter simbólico, é grandiosa. Os evanxelistas presentan a Xesús co rostro resplandecente mentres conversa con Moisés e Elías.
Os tres discípulos que o acompañaron ata o cume da montaña fican abraiados, sobrecollidos. Non saben que pensaren de todo aquilo. O misterio que envolve a Xesús é demasiado grande. Marcos di que estaban asustados.
A escena culmina de forma estraña: «Formouse unha nube que os cubriu e da nube saíu unha voz: «Este é o meu Fillo amado; escoitádeo!». O movemento de Xesús naceu escoitando a súa chamada. A súa Palabra, recollida máis tarde en catro pequenos escritos, foi procreando novos seguidores. A Igrexa vive escoitando o seu Evanxeo.
Esta mensaxe de Xesús atopa hoxe moitos obstáculos para chegar ata os homes e mulleres do noso tempo. Ao abandonaren a práctica relixiosa moitos deixaron de escoitalo para sempre. Xa non oirán falar de Xesús se non é de forma casual ou distraída.
Tampouco os que se achegan ás comunidades cristiás poden apreciar facilmente a Palabra de Xesús. A súa mensaxe pérdese entre outras prácticas, costumes e doutrinas. É difícil captar a súa importancia decisiva. A forza liberadora do seu Evanxeo fica ás veces bloqueada por linguaxes e comentarios alleos ao seu espírito.
Con todo, tamén hoxe o único decisivo que lle pode ofrecer a Igrexa á sociedade moderna é a Boa Noticia proclamada por Xesús e o seu proxecto humanizador do reino de Deus. Non podemos seguir retendo a forza humanizadora da súa Palabra.
Temos de facer que corra limpa, viva e abundante polas nosas comunidades. Que chegue ata os fogares, que a poidan coñecer quen buscan un sentido novo ás súas vidas, que a poidan escoitar quen viven sen esperanza.
Temos de aprender a lermos xuntos o Evanxeo. Familiarizármonos cos relatos evanxélicos. Poñérmonos en contacto directo e inmediato coa Boa Noticia de Xesús. Nisto habemos gastar as enerxías. De aquí empezará a renovación que necesita hoxe a Igrexa.
Cando a institución eclesiástica vai perdendo o poder de atracción que ha ter durante séculos, temos de descubrir a atracción que ten Xesús, o Fillo amado de Deus, para os que buscan verdade e vida. Dentro de poucos anos darémonos conta de que todo nos está empuxando a poñer con máis fidelidade a súa Boa Noticia no centro do cristianismo.
José Antonio Pagola
Tradutor: Xaquin Campo Freire
