VIVIR A DEUS DESDE DENTRO
Hai algúns anos, o gran teólogo alemán Karl Rahner atrevíase a afirmar que o principal e máis urxente problema da Igrexa dos nosos tempos era a súa «mediocridade espiritual». Estas eran as súas palabras: o verdadeiro problema da Igrexa é «seguir tirando cunha resignación e un tedio cada vez maiores polos camiños habituais dunha mediocridade espiritual».
O problema non fixo senón agravarse estas últimas décadas. De pouco serviron os intentos de reforzar as institucións, salvagardar a liturxia ou vixiar a ortodoxia. No corazón de moitos cristiáns estase apagando a experiencia interior de Deus.
A sociedade moderna apostou polo «exterior». Todo nos invita a vivirmos desde fóra. Todo nos preme para movérmonos con présa, sen apenas deternos en nada nin en ninguén. A paz xa non atopa físgoas para penetrar ata o noso corazón. Vivimos case sempre nas cortizas da vida. Estásenos esquecendo o que é saborear a vida desde dentro. Para ser humana, á nosa vida fáltalle hoxe unha dimensión esencial: a interioridade.
É triste observar que tampouco nas comunidades cristiás sabemos coidarmos e promover a vida interior. Moitos non saben o que é o silencio do corazón, non se ensina a vivir a fe desde dentro. Privados de experiencia interior, sobrevivimos esquecendo a nosa alma: escoitando palabras cos oídos e pronunciando oracións cos beizos mentres o noso corazón está ausente.
Na Igrexa fálase moito de Deus, pero, onde e cando escoitamos os crentes a presenza calada de Deus no máis fondo do corazón? Onde e cando acollemos o Espírito do Resucitado no noso interior? Cando vivimos en comuñón co Misterio de Deus desde dentro?
Acoller a Deus no noso interior quere dicir polo menos dúas cousas. A primeira: non colocar a Deus sempre lonxe e fóra de nós, é dicir, aprender a escoitalo no silencio do corazón. A segunda: baixar a Deus da cabeza ao profundo do noso ser, é dicir, deixar de pensar en Deus só coa mente e aprender a percibilo no máis íntimo de nós.
Esta experiencia interior de Deus, real e concreta, pode transformar a nosa fe. Un sorpréndese de como puidemos vivir sen descubrila antes. É posíbel atopar a Deus dentro de nós no medio dunha cultura secularizada. É posíbel tamén hoxe coñecer unha alegría interior nova e diferente. Pero paréceme moi difícil manter por moito tempo a fe en Deus no medio da axitación e frivolidade da vida moderna sen coñecer, aínda que sexa de xeito humilde e sinxelo, algunha experiencia interior do Misterio de Deus.
José Antonio Pagola
Tradutor: Xaquin Campo Freire
