PAUTAS PARA EDUCARMOS NA FE EN FAMILIA
Non descoidar a propia responsabilidade
É moito o que se pode facer. En primeiro lugar, preocuparse de que o fillo reciba unha educación relixiosa no colexio e tome parte na catequese parroquial. Logo, seguirmos de cerca esa educación que está recibindo fóra do fogar, coñecela e colaborarmos desde a casa apoiando e estimulando ao fillo. No fogar, actuarmos sen complexos, sen esconder ou disimular a propia fe. Isto é importante para os fillos.
A nosa conduta transmite unha imaxe de Deus
A través da conduta, sen dármonos conta, transmitimos unha imaxe de Deus aos propios fillos. A experiencia duns pais autoritarios e controladores vai transmitindo a imaxe dun Deus lexislador, xuíz vixiante e castigador. A experiencia duns pais despreocupados e permisivos, alleos aos fillos, vai transmitindo a sensación dun Deus indiferente cara a todo o de nós, un Deus coma inexistente. Pero se os fillos viven cos seus pais unha relación de confianza, comunicación e comprensión, a imaxe dun Deus Pai vaise interiorizando dun xeito positivo e enriquecedor nas súas conciencias.
Na educación da fe, o decisivo é o exemplo
Que os fillos poidan atoparen no seu propio fogar «modelos de identificación», que non lles sexa difícil saberen coma quen deben comportarse para viviren a súa fe dun xeito san, gozoso e responsábel. Só desde unha vida coherente coa fe podemos falar aos fillos con autoridade. Este testemuño de vida cristiá é particularmente importante no momento en que os fillos, xa adolescentes ou rapaces, van atopando no seu mundo outros modelos de identificación e outras claves para entenderen e viviren a vida.
Non todas as actuacións dos pais garanten unha educación sa da fe
Non abonda, por exemplo, crear hábitos de calquera xeito, repetir xestos mecanicamente, obrigar a certas condutas, impor a imitación. Só se interioriza o que se experimenta como bo. Aprendemos a crer en Deus cando, ao noso xeito, temos a experiencia dun Deus bo. A fe apréndese vivíndoa gozosamente. Por iso educan nunha fe sa os pais que viven a súa fe compartíndoa gozosamente cos seus fillos.
José Antonio Pagola, Dejar entrar en casa a Jesús, PPC, Madrid 2018, 79-80
Tradutor: Xaquin Campo Freire
