TESTEMUÑAS DA VERDADE
O xuízo ten lugar no pazo onde reside o prefecto romano cando acode a Xerusalén. Acaba de amencer. Pilato ocupa a sé e desde dita as súas sentenzas. Xesús comparece maniatado, oprimido e alxemado, coma un delincuente. Alí están, fronte a fronte, o representante do imperio máis poderoso e o profeta do reino de Deus.
A Pilato resúltalle incríbel que aquel home intente desafiar a Roma: «Así que, ti es rei?». Xesús é-lle moi claro: «O meu reino non é deste mundo». Non pertence a ningún sistema inxusto deste mundo. Non pretende ocupar ningún trono. Non busca poder nin riqueza.
Pero non lle oculta a verdade: «Son rei». Eu vin a este mundo a introducir verdade. Se o meu reino fose deste mundo tería «gardas» que loitarían por el con armas. Pero os seus seguidores non son «lexionarios», senón «discípulos» que escoitan a súa mensaxe e dedícanse a poñeren verdade, xustiza e amor no mundo.
O reino de Xesús non é o de Pilato. O prefecto vive para extraer as riquezas dos pobos e conducilas a Roma. Xesús vive «para ser testemuña da verdade». A súa vida é todo un desafío: «Todo aquel que é da verdade escoita a miña voz». Pilato non é da verdade. Non escoita a voz de Xesús. Dentro dunhas horas intentará apagala para sempre.
O seguidor de Xesús non é «gardián» da verdade, senón «testemuña». O seu quefacer non é disputar, combater e derrotar aos adversarios, senón vivir a verdade do evanxeo e comunicar a experiencia de Xesús, que está cambiando a súa vida.
O cristián tampouco é «propietario» da verdade, senón testemuña. Non impón a súa doutrina, non controla a fe dos demais, non pretende ter razón en todo. Vive converténdose a Xesús, contaxia a atracción que sente por el, axuda a mirar cara ao evanxeo, pon en todas partes a verdade de Xesús. A Igrexa atraerá á xente cando vexan que o noso rostro se parece ao de Xesús, e que a nosa vida recorda á súa.
José Antonio Pagola
Tradutor: Xaquin Campo Freire
