UNHA «REVOLUCIÓN IGNORADA»
Xesús adoptou unha actitude tan sorprendente ante as mulleres que desconcertou ata aos seus mesmos discípulos. Naquela sociedade xudía, dominada polos varóns, non era fácil entender a nova postura de Xesús, acollendo sen discriminacións a homes e mulleres na súa comunidade de seguidores. Se algo se desprende con claridade da súa actuación é que, para el, homes e mulleres teñen igual dignidade persoal, sen que a muller teña de ser obxecto do dominio do varón.
Con todo, os cristiáns non fomos aínda capaces de extraermos todas as consecuencias que se seguen da actitude do noso Mestre. O teólogo francés René Laurentin chegou a dicir que se trata «dunha revolución ignorada» pola Igrexa.
Polo xeral, os varóns seguimos sospeitando de todo movemento feminista, e reaccionamos secretamente contra calquera formulación que poida poñer en perigo a nosa situación privilexiada sobre a muller.
Nunha Igrexa dirixida por varóns non fomos capaces de descubrirmos todo o pecado que se agocha no dominio que os homes exercemos, de moitos xeitos, sobre as mulleres. E o certo é que non se escoitan desde a xerarquía voces que, en nome de Cristo, reclamen aos varóns unha profunda conversión.
Os seguidores de Xesús temos de tomar conciencia de que o actual dominio dos varóns sobre as mulleres non é «algo natural», senón un comportamento profundamente viciado polo egoísmo e a imposición inxusta do noso poder machista.
É posíbel superar este dominio masculino? A revolución urxida por Xesús non se levará a cabo espertando a agresividade mutua e promovendo entre os sexos unha guerra. Xesús chama a unha conversión que nos faga vivir doutro xeito as relacións que nos unen a homes e mulleres.
As diferenzas entre os sexos, ademais da súa función na orixe dunha nova vida, han seren encamiñadas cara á cooperación, o apoio e o crecemento mutuos. E, para iso, os varóns temos de escoitar con moita máis lucidez e sinceridade a interpelación daquel de quen, segundo o relato evanxélico, «saíu forza» para curar á muller.
José Antonio Pagola
Tradutor: Xaquin Campo Freire
