NON SENTIRNOS DEFRAUDADOS POR XESÚS
Nestes tempos de crise relixiosa e confusión interior, é importante lembrar que Xesús Cristo non é propiedade particular das igrexas. É de todos. A el poden achegárense cantos o confesen como Fillo de Deus, e tamén quen anda buscando un sentido máis humano ás súas vidas.
Hai xa algúns anos, o coñecido pensador Roger Garaudy, marxista convencido naquel tempo, gritaba así aos cristiáns: «Vós recollestes e conservastes esta esperanza que é Xesús Cristo. Devolvédenola! pois ela pertence a todo o mundo».
Case pola mesma época, Jean Onimus publicaba o seu apaixonante e insólito libro sobre Xesús co provocativo título de Le Perturbateur. Dirixíndose a Xesús, dicía así o escritor francés: «Por que vas permanecer propiedade privada dos predicadores, dos doutores e dalgúns eruditos, Ti que dixeches cousas tan sinxelas, palabras directas, palabras que permanecen para os homes, palabras de vida eterna?»
Por iso poucas cousas me producen máis alegría do que saber que homes e mulleres afastados da práctica relixiosa habitual buscan nos meus escritos atoparse con Xesús. Estou convencido de que El pode ser para moitos o mellor camiño para atoparse co Deus Amigo e para dar un sentido máis esperanzado ás súas vidas.
Xesús non deixa indiferente a ninguén que se achega a El. Un atópase, por fin, con alguén que vive na verdade, alguén que sabe por que hai que vivir e por que merece a pena morrer. Intúe que ese estilo de vivir «tan de Xesús» é a maneira máis acertada e humana de enfrontarse á vida e á morte.
Xesús sanda. A súa paixón pola vida pon ao descuberto a nosa superficialidade e convencionalismo. O seu amor aos indefensos desenmascara os nosos egoísmos e mediocridade. A súa verdade desvela os nosos auto enganos. Pero, sobre todo, a súa fe incondicional no Pai convídanos a saírmos da incredulidade e a confiarmos en Deus.
Quen hoxe abandonan a Igrexa porque se atopan incómodos dentro dela, ou porque discrepan dalgunha das súas actuacións ou directrices concretas, ou porque sinxelamente a liturxia cristiá perdeu para eles todo interese vital, non deberían, por iso, abandonar automaticamente a Xesús.
Cando un perdeu outros puntos de referencia e sente que «algo» está a morrer na súa conciencia, pode ser decisivo non perder contacto con Xesús Cristo. O texto evanxélico lémbranos as súas palabras: «Ditoso o que non se sinta defraudado por min!» Ditoso quen entenda todo o que Cristo pode significar na súa vida.
José Antonio Pagola
Tradutor: Xaquin Campo Freire
