OS NOSOS ERROS
Toda persoa que non queira vivir alienada ha manterse lúcida e vixiante ante os posíbeis erros que pode cometer na vida.
Unha das achegas máis válidas de Xesús é poder ofrecer a quen o coñece e segue a posibilidade de ser cada día máis humano. En Xesús podemos escoitar o grito de alerta ante os graves erros nos que podemos caer ao longo da vida.
O primeiro erro consiste en facer da satisfacción das necesidades materiais o obxectivo absoluto da nosa vida; pensar que a felicidade última do ser humano se atopa na posesión e no goce dos bens.
Segundo Xesús, esa satisfacción das necesidades materiais, con ser moi importante, non é suficiente. O home vaise facendo humano cando aprende a escoitar a Palabra do Pai, que o chama a vivir como irmán. Entón descobre que ser humano é compartir e non posuír; dar, e non acaparar; crear vida, e non explotar ao irmán.
O segundo erro consiste en buscar o poder, o éxito ou o triunfo persoal, por encima de todo e a calquera prezo. Incluso sendo infiel á propia misión e caendo escravo das idolatrías máis ridículas.
Segundo Xesús, a persoa acerta non cando busca o seu propio prestixio e poder, na competencia e a rivalidade cos demais, senón cando é capaz de vivir no servizo xeneroso e desinteresado aos irmáns.
O terceiro erro consiste en tratar de resolver o problema último da vida, sen riscos, loitas nin esforzos, utilizando interesadamente a Deus de xeito máxico e egoísta.
Segundo Xesús, entender así a relixión é destruíla. A verdadeira fe non conduce á pasividade, á evasión e ao absentismo ante os problemas. Ao contrario, quen entendeu un pouco o que é ser fiel a un Deus, Pai de todos, arríscase cada día máis na loita por lograr un mundo máis digno e xusto para todos.
José Antonio Pagola
Tradutor: Xaquin Campo Freire
