AS TENTACIÓNS DA IGREXA DE HOXE
A primeira tentación acontece no «deserto»
Despois dun longo xaxún, entregado ao encontro con Deus, Xesús sente fame. Entón, é cando o tentador lle suxire actuar pensando en si mesmo e esquecendo o proxecto do Pai: «Se es Fillo de Deus, di que estas pedras se convertan en pan». Xesús, desfalecido, pero cheo do Espírito de Deus, reacciona: Non só de pan vive o home, senón de toda palabra que sae de Deus». Non vivirá buscando o seu propio interese. Non será un Mesías egoísta. Multiplicará pans cando vexa pasar fame aos pobres. El alimentarase da Palabra viva de Deus.
Sempre que a Igrexa busca o seu propio interese, esquecendo o proxecto do reino de Deus, desvíase de Xesús. Sempre que os cristiáns antepomos o noso benestar ás necesidades dos últimos, afastámonos de Xesús.
A segunda tentación prodúcese no «templo»
O tentador proponlle a Xesús facer a súa entrada triunfal na cidade santa, descendendo do alto como Mesías glorioso. A protección de Deus está asegurada. Os seus anxos «coidarán» del. Xesús reacciona rápido: «Non tentarás ao Señor, o teu Deus». Non será un Mesías triunfador. Non porá a Deus ao servizo da súa gloria. Non fará sinais do ceo». Só signos para curar enfermos.
Sempre que a Igrexa pon a Deus ao servizo da súa propia gloria e «descende do alto» para mostrar a súa propia dignidade, desvíase de Xesús. Cando os seguidores de Xesús buscamos «quedar ben», máis que «facer o ben», afastámonos del.
A terceira tentación sucede nunha «montaña altísima»
Desde ela divísanse todos os reinos do mundo. Todos están controlados polo diaño, quen lle fai a Xesús unha oferta asombrosa: daralle todo o poder do mundo. Só unha condición: «Se te prostras e me adoras. Xesús reacciona violentamente: «Vaite, Satanás». «Só ao Señor, o teu Deus, adorarás». Deus non o chama a dominar o mundo como o emperador de Roma, senón a servir aos que viven oprimidos polo seu imperio. Non será un Mesías dominador, senón servidor. O reino de Deus non se impón con poder, ofrécese con amor.
A Igrexa ten de escorrentar hoxe todas as tentacións de poder, gloria ou dominación, gritando con Xesús: «Vaite, Satanás». O poder mundano é unha oferta diabólica. Cando os cristiáns o buscamos, afastámonos de Xesús.
José Antonio Pagola
Tradutor: Xaquin Campo Freire
