A VIDA COMO AGASALLO
Hoxe case todo nos está a convidar a vivirmos baixo o signo da actividade, a programación e o rendemento. Poucas diferenzas houbo nisto entre o capitalismo e o socialismo. Á hora de valorarmos á persoa, sempre se termina por medila pola súa capacidade de produción.
Podemos dicir que a sociedade moderna chegou á convicción práctica de que para darlle o seu verdadeiro sentido á vida, para o seu contido máis pleno, o único importante é sacarlle o máximo rendemento por medio do esforzo e a actividade.
Por iso se nos fai tan estraña e embarazosa esa pequena parábola, recollida polos evanxelista Marcos, na que Xesús compara o «reino de Deus» cunha semente que crece por si soia, sen que o labrador lle proporcione a forza para xerminar e crecer. Sen dúbida o traballo da sementeira que realiza o labrador é moi importante, pero na semente hai algo que el non puxo: hai unha forza vital que non se lle debe ao seu esforzo.
Experimentar a vida como agasallo é probabelmente unha das cousas que máis nos pode facer aos homes e mulleres de hoxe vivirmos dunha maneira nova. Estarmos máis atentos non só ao que conseguimos co noso traballo, senón tamén ao que imos recibindo de maneira gratuíta.
Aínda que talvez non o percibamos así, a nosa maior «desgraza» é vivirmos centrados só no noso esforzo, sen deixármonos agraciar e bendicir por Deus, sen gozarmos do que se nos vai regalando constantemente: pasarmos pola vida sen deixarnos sorprender pola «novidade» de cada día.
Todos necesitamos hoxe aprendermos a vivir de maneira máis aberta e acolledora, en actitude máis contemplativa e agradecida. Alguén dixo que hai problemas que non se «resolven» a base de esforzo, senón que se «disolven» cando sabemos acoller a graza de Deus en nós. Esquécesenos que, en definitiva, como dicía Georges Bernanos, «todo é graza», porque todo, absolutamente todo, está sostido e penetrado polo misterio dese Deus que é graza, perdón e acollida para todas as súas criaturas. Así nolo revela Xesús.
José Antonio Pagola
Tradutor: Xaquin Campo Freire
