SEGUIRMOS A XESÚS
SEN MEDO
O recordo da execución de Xesús estaba aínda moi recente. Polas comunidades cristiás circulaban diversas versións da súa paixón. Todos sabían que era perigoso seguir a alguén que terminara tan mal. Lembrábase unha frase de Xesús: «O discípulo non está por encima do seu mestre». Se a el lle chamaron Belcebú, que non dirán dos seus seguidores?
Xesús non quería que os seus discípulos se fixesen falsas ilusións. Ninguén pode pretender seguilo de verdade sen compartir dalgunha maneira a súa sorte. Nalgún momento alguén nos rexeitará, maltratará, insultará ou condenará. Que hai que facer?
A resposta sáelle a Xesús desde dentro: «Non lles teñades medo». O medo é malo. Non ten de paralizar nunca aos seus discípulos. Non han calar. Non han cesar de propagaren a súa mensaxe por ningún motivo.
Xesús explícalles como han situarse ante a persecución. Con el comezou xa a revelación da Boa Noticia de Deus. Deben confiar. O que aínda está «encuberto» e «escondido» a moitos, un día quedará patente: coñecerase o Misterio de Deus, o seu amor ao ser humano e o seu proxecto dunha vida máis feliz para todos.
Os seguidores de Xesús están chamados a tomaren parte desde agora nese proceso de revelación: «O que eu vos digo de noite, dicídeo en pleno día». O que lles explica á noitiña, antes de retirárense a descansar, teñen de comunicalo sen medo «a pleno día». «O que eu vos digo ao oído, pregoádeo desde os tellados». O que lles rumorea ao oído para que penetre ben no seu corazón, teñen e facelo público.
Xesús insiste en que non teñan medo. «Quen se pon da miña parte», nada ha temer. O último xuízo será para el unha sorpresa gozosa. O xuíz será «o meu Pai do ceo», o que vos ama sen fin. Eu mesmo serei o defensor, quen me porei da vosa parte». Quen pode infundirnos máis esperanza no medio das probas?
Xesús imaxinaba aos seus seguidores coma un grupo de crentes que saben «pórse da súa parte» sen medo. Por que somos tan pouquiño libres para abrir novos camiños máis fieis a Xesús? Por que non nos atrevemos a expor de maneira sinxela, clara e concreta o esencial do evanxeo?
José Antonio Pagola
Tradutor: Xaquin Campo Freire
