DEUS REVÉLASE AOS SINXELOS
Un día, Xesús sorprendeu a todos dando grazas a Deus polo seu éxito coa xente sinxela de Galilea e polo seu fracaso entre os mestres da lei, escribas e sacerdotes. «Douche grazas, Pai, porque escondiches estas cousas aos sabios e entendidos e reveláchesllas á xente sinxela». A Xesús véselle contento. «Si, Pai, así che pareceu mellor». Ese é o xeito que ten Deus de revelar as súas «cousas».
A xente sinxela e ignorante, os que non teñen acceso a grandes coñecementos, os que non contan na relixión do templo, estanse abrindo a Deus con corazón limpo. Están dispostos a deixárense ensinar por Xesús. O Pai estalles revelando o seu amor a través del. Entenden a Xesús coma ninguén.
Con todo, os «sabios e entendidos» non entenden nada. Teñen a súa propia visión cognitiva, intelectualista, de Deus e da relixión. Creen sabelo todo. Non aprenden nada novo de Xesús. A súa visión pechada e o seu corazón endurecido impídenlles abrírense á revelación do Pai a través do seu Fillo.
Xesús termina a súa oración, pero segue pensando na «xente sinxela». Viven oprimidos polos poderosos e non atopan alivio na relixión do templo. A súa vida é dura, e a doutrina que lles ofrecen os «entendidos» faina aínda máis dura e difícil. Xesús failles tres chamadas.
«Vinde a min todos os que estades cansos e angustiados». É a primeira chamada. Está dirixida a todos os que senten a relixión coma un peso e aos que viven angustiados por normas e doutrinas que lles impoñen e impiden captar a alegría da salvación. Si. Atópanse vitalmente con Xesús, experimentarán un alivio inmediato: «Eu aliviareivos».
«Cargade co meu xugo! Que é levadeiro e a miña carga lixeira». É a segunda chamada. Hai que cambiar de xugo. Abandonar o dos «sabios e entendidos», pois non é lixeiro, e cargar co de Xesús, que fai a vida máis levadeira. Non porque Xesús esixa menos. Esixe máis, pero doutro xeito. Esixe o esencial: o amor que libera e fai vivir.
«Aprendede de min, que son manso e humilde de corazón». É a terceira chamada. Hai que aprender a cumprir a lei e vivir a relixión co seu espírito. Xesús non «complica» a vida, faina máis simple e humilde. Non oprime, axuda a vivir de xeito máis digno e humano. Atoparse con el é un «descanso».
José Antonio Pagola
Tradutor: Xaquin Campo Freire
