TRES CHAMADAS DE XESÚS
Eu dígovos: «Pedide e hásevos dar. Buscade e atoparedes. Chamade e abrirásevos». É fácil que Xesús pronunciase estas palabras cando se movía polas aldeas de Galilea pedindo algo para comer, buscando acollida e chamando á porta dos veciños. El sabía aproveitar as experiencias máis sinxelas da vida para espertar a confianza dos seus seguidores no Pai Bo de todos.
Curiosamente, en ningún momento se nos di o que habemos pedir ou buscar nin en que porta habemos petar. O importante para Xesús é a actitude. Ante o Pai habemos vivir como pobres que piden o que necesitan para viviren, como perdidos que buscan o camiño que non coñecen ben, como desvalidos que chaman á porta de Deus.
As tres chamadas de Xesús invítannos a espertar á confianza no Pai, pero faino con matices diferentes. Pedir. É a actitude propia do pobre. A Deus habemos pedirlle o que non nos podemos dar a nós mesmos: o alento da vida, o perdón, a paz interior, a salvación. Buscar, non é só pedir. É, ademais, dar pasos para conseguir o que non está ao noso alcance. Así temos buscar ante todo o reino de Deus e a súa xustiza: un mundo máis humano e digno para todos. «Chamar» é dar golpes á porta, insistir, gritarlle a Deus cando o sentimos lonxe.
A confianza de Xesús no Pai é absoluta. Quere que os seus seguidores non o esquezan nunca: o que pide, está recibindo; o que busca está atopando e ao que chama, ábreselle. Xesús non di que reciben concretamente os que están pedindo, que atopan o que andan buscando ou que alcanzan os que gritan. A súa promesa é outra: a quen confían nel Deus dáselles; quen acoden a el reciben «cousas boas».
Xesús non dá explicacións complicadas. Pon tres exemplos que poden entender os pais e as nais de todos os tempos. Que pai ou que nai, cando o fillo lle pide un boliño de pan, lle dá unha pedra de forma redonda como as que poden ver polos camiños? Ou se lle pide un peixe, lle vai dar unha desas cobras de auga que ás veces aparecen nas redes de pesca? Ou, se lle pide un ovo, lle dará un escorpión apelotado deses que se ven pola beira do lago?
Os pais non se burlan dos seus fillos. Non os enganan nin lles dan algo que poida facerlles dano senón «cousas boas». Xesús saca rapidamente a conclusión. «Canto máis o voso Pai do ceo dará o seu Espírito aos que llo pidan?». Para Xesús, o mellor que podemos pedir e recibir de Deus é o seu Alento, o seu Espírito, o seu Amor que sostén e salva a nosa vida.
José Antonio Pagola
Tradutor: Xaquin Campo Freire
