VIVIR EN MINORÍA
Lucas recompilou no seu evanxeo unhas palabras, cheas de afecto e agarimo, dirixidas por Xesús aos seus seguidores e seguidoras. Con frecuencia, adoitan pasaren desapercibidas. Con todo, lidas hoxe con atención desde as nosas parroquias e comunidades cristiás, cobran unha sorprendente actualidade. É o que necesitamos escoitar de Xesús nestes tempos non fáciles para a fe.
«O meu pequeno rabaño». Xesús mira con tenrura inmensa ao seu pequeno grupo de seguidores. Son poucos. Teñen vocación de minoría. Non han pensar en grandezas. Así os imaxina Xesús sempre: coma un pouco de fermento oculto na masa, unha pequena «luz» no medio da escuridade, un puñado de «sal» para poñer sabor á vida.
Logo de séculos de «imperialismo cristián», os discípulos de Xesús habemos aprender a vivirmos en minoría. É un erro ter saudades dunha Igrexa poderosa e forte. É un engano buscar o poder mundano ou pretender dominar a sociedade. O evanxeo non se impón pola forza. Contáxiano quen viven ao estilo de Xesús facendo a vida máis humana.
«Non teñades medo». É a gran preocupación de Xesús. Non quere ver aos seus seguidores paralizados polo medo nin afundidos no desalento. Non han preocuparse. Tamén hoxe somos un pequeno rabaño, pero podemos permanecer moi unidos a Xesús, o Pastor que nos guía e deféndenos. El pódenos facer vivir estes tempos con paz.
«O voso Pai quixo darvos o reino». Xesús recórdallelo unha vez máis. Non han sentirse orfos. Teñen a Deus como Pai. El confioulles o seu proxecto do reino. É o seu gran agasallo. O mellor que temos nas nosas comunidades: a tarefa de facer a vida máis humana e a esperanza de encamiñar a historia cara á súa salvación definitiva.
«Vendede os vosos bens e dade esmola». Os seguidores de Xesús son un pequeno rabaño, pero nunca han ser unha seita encerrada nos seus propios intereses. Non vivirán de costas ás necesidades de ninguén. Serán comunidades de portas abertas. Compartirán os seus bens cos que necesitan axuda e solidariedade. Darán esmola, é dicir, «misericordia». Este é precisamente o significado do termo grego.
Os cristiáns necesitaremos aínda algún tempo para aprendermos a vivir en minoría no medio dunha sociedade secular e plural. Pero hai algo que podemos e debemos facer sen agardarmos por nada: transformar o clima que se vive nas nosas comunidades e facelo máis evanxélico. O papa Francisco estanos sinalando o camiño cos seus xestos e o seu estilo de vida.
José Antonio Pagola
Tradutor: Xaquin Campo Freire
