NO MARCO DO DESERTO
Lucas ten interese en precisar con detalle os nomes das personaxes que controlan naquel momento as diferentes esferas do poder político e relixioso. Eles son quen o planifican e dirixen todo. Con todo, o acontecemento decisivo de Xesús Cristo prepárase e acontece fóra do seu ámbito de influencia e poder, sen que eles se decaten nin decidan nada.
Así aparece sempre o esencial no mundo e nas nosas vidas. Así penetra na historia humana a graza e a salvación de Deus. O esencial non está nas mans dos poderosos. Lucas di concisamente que «a Palabra de Deus veu sobre Xoán no deserto», non na Roma imperial nin no recinto sagrado do Templo de Xerusalén.
En ningures se pode escoitar mellor que no deserto a chamada de Deus para cambiar o mundo. O deserto é o territorio da verdade. O lugar onde se vive do esencial. Non hai sitio para o superfluo. Non se pode vivir acumulando cousas sen necesidade. Non é posíbel o luxo nin a ostentación. O decisivo é buscar o camiño acertado para orientar a vida.
Por iso, algúns profetas tiñan tanta señardade do deserto, símbolo dunha vida máis sinxela e mellor enraizada no esencial, unha vida aínda sen deformar por tantas infidelidades a Deus e tantas inxustizas co pobo. Neste marco do deserto, o Bautista anuncia o símbolo grandioso do «Bautismo», punto de partida de conversión, purificación, perdón e inicio de vida nova.
Como responder hoxe a esta chamada? O Bautista resúmeo nunha imaxe tomada de Isaías: «Preparade o camiño do Señor». As nosas vidas están sementadas de obstáculos e resistencias que impiden ou dificultan a chegada de Deus aos nosos corazóns e comunidades, á nosa Igrexa e ao noso mundo. Deus está sempre preto. Somos nós os que temos de abrirmos camiños para acollelo encarnado en Xesús.
As imaxes de Isaías invitan a compromisos moi básicos e fundamentais: coidar mellor o esencial sen distraérmonos no secundario; rectificar o que fomos deformando entre todos; enderezar camiños tortos; afrontar a verdade real das nosas vidas para recuperarmos un talante de conversión. Temos de coidar ben os bautizos dos nosos nenos, pero o que necesitamos todos é un «bautismo de conversión».
José Antonio Pagola
Tradutor: Xaquin Campo Freire
