OSMEDOS NA IGREXA
Probablemente é o medo o que máis paraliza aos cristiáns no seguimento fiel a Xesús Cristo. Na Igrexa actual hai pecado e debilidade, pero hai sobre todo medo a correr riscos. Comezamos o terceiro milenio sen audacia para renovar creativamente a vivencia da fe cristiá. Non é difícil sinalar algún destes medos.
Temos medo ao novo, coma se «conservar o pasado» garantise automaticamente a fidelidade ao Evanxeo. É certo que o Concilio Vaticano II afirmou de maneira rotunda que na Igrexa ten de haber «unha constante reforma», pois «como institución humana necesítaa permanentemente». Con todo, non é menos certo que o que move nestes momentos a Igrexa non é tanto un espírito de renovación canto un instinto de conservación.
Temos medo para asumirmos as tensións e conflitos que leva consigo buscarmos a fidelidade ao evanxeo. Calamos cando teriamos que falar; inhibímonos cando deberiamos intervir. Prohíbese o debate de cuestións importantes, para evitar formulacións que poden inquietar; preferimos a adhesión rutineira que non trae problemas nin desgusta á xerarquía.
Temos medo á investigación teolóxica creativa. Medo a revisar ritos e linguaxes litúrxicas que non favorecen hoxe a celebración viva da fe. Medo a falar dos «dereitos humanos» dentro da Igrexa. Medo a recoñecerlle practicamente á muller o lugar máis acorde co espírito de Xesús.
Temos medo a antepor a misericordia por cima de todo, esquecendo que a Igrexa non recibiu o «ministerio do xuízo e a condena», senón o «ministerio da reconciliación». Hai medo a acollermos aos pecadores como o facía Xesús. Dificilmente se dirá hoxe da Igrexa que é «amiga de pecadores», como se dicía do seu Mestre.
Segundo o relato evanxélico, os discípulos caen por terra «cheos de medo» ao ouviren unha voz que lles di: «Este é o meu Fillo amado… escoitádeo». Dá medo escoitar só a Xesús. É o mesmo Xesús quen se achega, tócaos e dilles: «Levantádevos, non teñades medo». Só o contacto vivo con Cristo nos podería liberar de tanto medo.
José Antonio Pagola
Tradutor: Xaquin Campo Freire
