DEIXARNOS BAUTIZAR POLO ESPÍRITO DE XESÚS
Os evanxelistas esfórzanse por diferenciar ben o bautismo de Xesús do bautismo de Xoán. Non hai que confundilos. O bautismo de Xesús non consiste en mergullar aos seus seguidores nas augas dun río. Xesús mergulla aos seus no Espírito Santo. O evanxeo de Xoán dío de xeito claro. Xesús posúe a plenitude do Espírito de Deus, e por iso pode comunicar aos seus esa plenitude. A gran novidade de Xesús consiste en que Xesús é «o Fillo de Deus» que pode «bautizar con Espírito Santo».
Este bautismo de Xesús non é un baño externo, parecido ao que algúns puideron coñecer talvez nas augas do Xordán. É un «baño interior». A metáfora suxire que Xesús comunica o seu Espírito para penetrar, empapar e transformar o corazón da persoa.
Este Espírito Santo é considerado polos evanxelistas como «Espírito de vida». Por iso, deixármonos bautizar por Xesús significa acollermos o seu Espírito como fonte de vida nova. O seu Espírito pode potenciar en nós unha relación máis vital con el. Pódenos levar a un novo nivel de existencia cristiá, a unha nova etapa de cristianismo máis fiel a Xesús.
O Espírito de Xesús é «Espírito de verdade». Deixármonos bautizar por el é poñer verdade no noso cristianismo. Non deixármonos enganar por falsas seguridades. Recuperarmos unha e outra vez a nosa identidade irrenunciábel de seguidores de Xesús. Abandonar camiños que nos desvían do evanxeo
O Espírito de Xesús é «Espírito de amor», capaz de liberarnos da covardía e do egoísmo de vivirmos pensando só nos nosos intereses e o noso benestar. Deixarnos bautizar por el é abrirnos ao amor solidario, gratuíto e compasivo.
O Espírito de Xesús é «Espírito de conversión» a Deus. Deixarnos bautizar por el significa deixarnos transformar lentamente por el. Aprender a vivirmos cos seus criterios, as súas actitudes, o seu corazón e a súa sensibilidade a prol de quen viven sufrindo.
O Espírito de Xesús é «Espírito de renovación». Deixarnos bautizar por el é deixármonos atraer pola súa novidade creadora. El pode espertar o mellor que hai na Igrexa e darlle un «corazón novo», con meirande capacidade de ser fiel ao evanxeo.
José Antonio Pagola
Tradutor: Xaquin Campo Freire
