O PRIMEIRO
Algúns ambientes cristiáns do século I tiveron moito interese en non seren confundidos cos seguidores do Bautista. A diferenza, segundo eles, era abismal. Os «bautistas» vivían dun rito externo que non transformaba ás persoas: un bautismo de auga. Os «cristiáns», pola contra, deixábanse transformar internamente polo Espírito de Xesús.
Esquecer isto é mortal para a Igrexa. O movemento de Xesús non se sostén con doutrinas, normas ou ritos vividos desde o exterior. É o mesmo Xesús quen ha «bautizar» ou empapar aos seus seguidores co seu Espírito.
E é este Espírito quen os ha de animar, impulsar e transformar. Sen este «bautismo do Espírito» non hai cristianismo.
Non o habemos esquecer. A fe que hai na Igrexa non está nos documentos do maxisterio nin nos libros dos teólogos.
A única fe real é a que o Espírito de Xesús esperta nos corazóns e as mentes dos seus seguidores. Eses cristiáns sinxelos e honestos, de intuición evanxélica e corazón compasivo, son os que de verdade «reproducen» a Xesús e introducen o seu Espírito no mundo. Eles son o mellor que temos na Igrexa.
Desgraciadamente, hai outros moitos que non coñecen por experiencia esa forza do Espírito de Xesús. Viven unha «relixión de segunda man». Non coñecen nin aman a Xesús. Sinxelamente creen o que din outros. A súa fe consiste en crer o que di a Igrexa, o que ensina a xerarquía ou o que escriben os entendidos, aínda que eles non experimenten no seu corazón nada do que viviu Xesús. Como é natural, co paso dos anos, a súa adhesión ao cristianismo vaise disolvendo.
O primeiro que necesitamos hoxe os cristiáns non son catecismos que definan correctamente a doutrina cristiá nin exhortacións que precisen con rigor as normas morais. Só con iso non se transforman as persoas. Hai algo previo e máis decisivo: narrar nas comunidades a figura de Xesús, axudar aos crentes a pórse en contacto directo co evanxeo, ensinar a coñecer e amar a Xesús, aprendermos xuntos a vivir co seu estilo de vida e o seu espírito. Recuperarmos o «bautismo do Espírito», non é esta a primeira tarefa na Igrexa?
José Antonio Pagola
Tradutor: Xaquin Campo Freire
