SEN LUME
NON É POSÍBEL
Nun estilo claramente profético, Xesús resume a súa vida enteira cunhas palabras insólitas: «Eu vin prender lume ao mundo, e oxalá estivese xa ardendo!». De que está a falar Xesús? O carácter enigmático da súa linguaxe conduce aos eséxetas a buscaren a resposta en diferentes direccións. En calquera caso, a imaxe do «lume» estanos invitando a achegarnos ao seu misterio de xeito máis ardente e apaixonada.
O lume que arde no seu interior é a paixón por Deus e a compaixón polos que sofren. Xamais poderá ser desvelado ese amor insondábel que anima a súa vida enteira. O seu misterio non ficará nunca encerrado en fórmulas dogmáticas nin en libros de sabios. Ninguén escribirá un libro definitivo sobre el. Xesús atrae e queima, turba e purifica. Ninguén poderá seguilo co corazón apagado ou con piedade aburrida.
A súa palabra fai arder os corazóns. Ofrécese amigabelmente aos máis excluídos, esperta a esperanza nas prostitutas e a confianza nos pecadores máis desprezados, loita contra todo o que fai dano no ser humano. Combate os formalismos relixiosos, os rigorismos inhumanos e as interpretacións estreitas da lei. Nada nin ninguén pode encadear a súa liberdade para facer o ben. Nunca poderemos seguilo vivindo na rutina relixiosa ou o convencionalismo de «o correcto».
Xesús acende os conflitos, non os apaga. Non veu traer falsa tranquilidade, senón tensións, enfrontamento e divisións. En realidade, introduce o conflito no noso propio corazón. Non podemos defendernos da súa chamada tralo escudo de ritos relixiosos ou prácticas sociais. Ningunha relixión nos protexerá da súa mirada. Ningún agnosticismo nos vai librar do seu desafío. Xesús estanos chamando a vivirmos en verdade e a amar sen egoísmos.
O seu lume non quedou apagado ao mergullarse nas augas profundas da morte. Resucitado a unha vida nova, o seu Espírito segue ardendo ao longo da historia. Os discípulos de Emaús sénteno arder nos seus corazóns cando escoitan as súas palabras mentres camiña xunto a eles.
Onde é posíbel sentir hoxe ese lume de Xesús? Onde podemos experimentar a forza da súa liberdade creadora? Cando arden os nosos corazóns ao acoller o seu Evanxeo? Onde se vive de xeito apaixonado seguindo os seus pasos? Aínda que a fe cristiá parece extinguirse hoxe entre nós, o lume traído por Xesús ao mundo segue ardendo baixo as cinzas. Non podemos deixar que se apague. Sen lume no corazón non é posíbel seguir a Xesús.
José Antonio Pagola
Tradutor: Xaquin Campo Freire
