AMOR Á VIDA
Fronte ás diferentes tendencias destrutivas que se poden detectar na sociedade contemporánea (necrofilia), Erich Fromm fixo unha chamada vigorosa a desenvolvermos todo o que sexa amor á vida (biofilia), se non queremos caer no que o soado científico chama «síndrome de decadencia».
Sen dúbida, teremos de estar moi atentos ás diversas formas de agresividade, violencia e destrución que se xeran na sociedade moderna. Máis ca dun estudo sociolóxico estáse a falar da auténtica «cultura da violencia». Pero hai outras formas máis sutís e, por iso mesmo, máis eficaces de destruír o crecemento e a vida das persoas.
A mecanización do traballo, a masificación do estilo de vida, a burocratización da sociedade, a «cousificación» das relacións, son outros tantos factores que están levando a moitas persoas a sentírense non seres vivos, senón pezas dunha engrenaxe social.
Millóns de individuos viven hoxe en Occidente unhas vidas cómodas, pero monótonas, onde a falta de sentido e de proxecto pode afogar todo crecemento verdadeiramente humano.
Entón, algunhas persoas terminan por perderen o contacto con todo o que é vivo. A súa vida énchese de cousas. Só parecen vibrar adquirindo novos artigos. Funcionan segundo o programa que lles dita a sociedade.
Outras buscan toda clase de estímulos. Necesitan traballar, producir, axitarse ou divertirse. Han experimentaren sempre novas emocións. Algo excitante que lles permita sentírense aínda vivas.
Se algo caracteriza a personalidade de Xesús é o seu amor apaixonado á vida, a súa biofilia. Os relatos evanxélicos preséntano loitando contra todo o que bloquea a vida, a mutila ou empequenece. Sempre atento ao que pode facer crecer ás persoas. Sempre sementando vida, saúde, sentido.
El mesmo trázanos a súa tarefa con expresións tomadas de Isaías: «Os cegos ven e os inválidos andan; os leprosos quedan limpos e os xordos oen; os mortos resucitan e aos pobres anúnciaselles a Boa Nova. E ditoso quen non se senta defraudado por min».
Ditosos en verdade os que descobren que ser crente non é odiar a vida, senón amala, non é bloquear ou mutilar o noso ser, senón abrilo ás súas mellores posibilidades. Moitas persoas abandonan hoxe a fe en Xesús-Cristo antes de experimentaren a verdade destas palabras súas: «Eu vin para que os homes teñan vida, e a teñan en abundancia» (Xoán 10,10).
José Antonio Pagola
Tradutor: Xaquin Campo Freire
