NO MEDIO DO DESERTO
Os grandes movementos relixiosos naceron case sempre no deserto. Son os homes e as mulleres do silencio e a soidade quen, ao veren a luz, poden converterse en mestres e guías da humanidade. No deserto non é posíbel o superfluo. No silencio só se escoitan as preguntas esenciais. Na soidade só sobrevive quen se alimenta do interior.
No cuarto evanxeo, o Bautista fica reducido ao esencial. Non é o Mesías. Nin Elías volto á vida. Nin o Profeta esperado. El é «a voz que grita no deserto». Non ten poder político, non posúe título relixioso algún. Non fala desde o templo ou da sinagoga. A súa voz non nace da estratexia política nin dos intereses relixiosos. Vén do que lle escoita ao ser humano cando profunda no esencial.
O presentimento do Bautista pódese resumir así: «Hai algo máis grande, máis digno e esperanzador ca o que estamos a vivir. A nosa vida ha de cambiar de raíz». Non chega con frecuentar a sinagoga sábado tras sábado. De nada serve ler rutinariamente os textos sacros. É inútil ofrecer regularmente os sacrificios prescritos pola Lei. Non dá vida calquera relixión. Hai que abrirse ao Misterio do Deus vivo.
Na sociedade da abundancia e do progreso está a facerse cada vez máis difícil escoitar unha voz que veña do deserto. O que se oe é a publicidade do superfluo, a divulgación do trivial, a palabraría de políticos prisioneiros da súa estratexia, e ata discursos relixiosos interesados.
Alguén podería pensar que xa non é posíbel coñecer a testemuñas que nos falen desde o silencio e a verdade de Deus. Non é así! No medio do deserto da vida moderna podemos atopármonos con persoas que irradian sabedoría e dignidade, pois non viven do superfluo. Xente sinxela, entrañabelmente humana. Non pronuncian moitas palabras. É a súa vida a que fala.
Eles convídannos, como o Bautista, a deixarnos «bautizar», mergullarnos nunha vida diferente, recibir un novo nome, «renacer» para non sentírmonos produto desta sociedade nin fillos do ambiente, senón fillos e fillas queridos de Deus.
José Antonio Pagola
Tradutor: Xaquin Campo Freire
