CONTRIBUÍR Á CONVERSIÓN DA IGREXA
Non son poucos os que se afastaron da fe, escandalizados ou decepcionados pola actuación dunha Igrexa que, segundo eles, non é fiel ao evanxeo nin actúa en coherencia co que predica. Tamén Xesús criticou con forza aos dirixentes relixiosos: «Non fan o que din». E Xesús non ficou aí. Seguiu buscando e chamando a todos a un tempo a unha vida máis digna e responsábel ante Deus.
Ao longo dos anos, tamén eu puiden coñecer, ata de cerca, actuacións da Igrexa pouco coherentes co evanxeo Ás veces escandalizáronme, outras fixéronme dano. Case sempre me encheron de pena. Hoxe, con todo, comprendo mellor ca nunca que a mediocridade da Igrexa non xustifica a mediocridade da miña fe.
A Igrexa terá que cambiar moito, pero o importante é que cada un de nós reavivemos a nosa fe, que aprendamos a crer de xeito diferente, que non vivamos eludindo a Deus, que sigamos con honestidade as chamadas da propia conciencia, que cambie o noso xeito de mirarmos a vida, que descubramos o esencial do evanxeo e o vivamos con gozo.
A Igrexa terá que superar as súas inercias e medos para encarnar o evanxeo na sociedade moderna, pero cada un habemos descubrir que hoxe se pode seguir a Cristo con máis verdade do que nunca, sen falsos apoios sociais e sen rutinas relixiosas. Cada un temos de aprender a vivirmos de xeito máis evanxélico o traballo e a festa, a actividade e o silencio, sen deixarnos modelar pola sociedade, e sen perdermos a nosa identidade cristiá na frivolidade moderna.
A Igrexa terá que revisar a fondo a súa fidelidade a Cristo, pero cada un habemos verificar a calidade da nosa adhesión a el. Cada un habemos de coidar a nosa fe no Deus revelado en Xesús. O pecado e as miserias da institución eclesial non me dispensan nin me desresponsabilizan de nada. A decisión de abrirme a Deus ou de rexeitalo é só miña.
A Igrexa terá que espertar a súa confianza e liberarse de covardías e receos que lle impiden contaxiar esperanza no mundo actual, pero cada un somos responsábeis da nosa alegría interior. Cada un habemos alimentar a nosa esperanza acudindo á verdadeira fonte.
José Antonio Pagola
Tradutor: Xaquin Campo Freire
