É RIDÍCULO ESPERARMOS EN DEUS?
Os saduceos non gozaban de popularidade entre as xentes das aldeas. Era un sector composto por familias ricas pertencentes á elite de Xerusalén, de tendencia conservadora, tanto no seu xeito de viviren a relixión como na súa política de buscaren un entendemento co poder de Roma. Non sabemos moito máis.
O que podemos dicir é que «negaban a resurrección». Considerábana unha «novidade» propia de xente inxenua. Non lles preocupaba a vida máis aló da morte. A eles íalles ben nesta vida. Para que preocupárense de máis?
Un día achéganse a Xesús para ridiculizaren a fe na resurrección. Preséntanlle un caso absolutamente irreal, froito da súa fantasía. Fálanlle de sete irmáns que han ir casando sucesivamente coa mesma muller, para asegurárenlle a continuidade do nome, o honor e a herdanza á rama masculina daquelas poderosas familias saduceas de Xerusalén. É o único que entenden.
Xesús critica a súa visión da resurrección: é ridículo pensar que a vida definitiva xunto a Deus vaia consistir en reproducir e prolongar a situación desta vida, e en concreto desas estruturas patriarcais das que se benefician os varóns ricos.
A fe de Xesús na outra vida non consiste en algo tan irrisorio: «O Deus de Abrahán, de Isaac e de Xacobe non é un Deus de mortos, senón de vivos». Xesús non pode nin imaxinar que a Deus se lle vaian morrendo os seus fillos; Deus non vive por toda a eternidade rodeado de mortos. Tampouco pode imaxinar que a vida cabo Deus consista en perpetuar as desigualdades, inxustizas e abusos deste mundo.
Cando se vive de xeito frívolo e satisfeito, gozando do propio benestar e esquecendo aos que viven sufrindo, é fácil pensar só nesta vida. Pode parecer ata ridículo alimentar outra esperanza.
Cando se comparte un pouco o sufrimento das maiorías pobres, as cousas cambian: Que dicirmos dos que morren sen coñeceren o pan, a saúde ou o amor? Que dicirmos de tantas vidas malogradas ou sacrificadas inxustamente? É ridículo alimentarmos a esperanza en Deus?
José Antonio Pagola
Tradutor: Xaquin Campo Freire
