DEUS ESTÁ CONNOSCO
O Nadal está tan desfigurado que mesmo parece case imposíbel axudarlle hoxe a alguén a comprender o misterio que encerra. Talvez hai un camiño, pero cada un hao percorrer persoalmente. Non consiste en entendermos grandes explicacións teolóxicas, senón en vivirmos unha experiencia interior humilde ante Deus.
As grandes experiencias da vida son un agasallo, pero, de ordinario, só as viven quen están dispostos a recibilas. Para vivir a experiencia do Fillo de Deus feito home hai que prepararse por dentro. O evanxelista Mateu vénnos dicir que Xesús, o neno que nace en Belén, é o único ao que podemos chamar con toda verdade «Emmanuel», que significa «Deus connosco». Pero que quere dicir isto? Como podes ti «saber» que Deus está contigo?
Ten valor para ficar a soas. Busca un lugar tranquilo e sosegado. Escóitate a ti mesmo. Achégate silenciosamente a todo o máis íntimo do teu ser. É fácil que experimentes unha sensación tremenda: que só estás na vida; que lonxe están todas esas persoas que te rodean e ás que te sentes unido polo amor. Quérenche moito, pero están fóra de ti.
Segue en silencio. Talvez sintas unha impresión estraña: ti vives porque estás arraigado nunha realidade inmensa e descoñecida. De onde che chega a vida? Que hai no fondo do teu ser? Se es capaz de «aguantar» un pouco máis o silencio, probabelmente empezas a sentir temor e, ao mesmo tempo, paz. Estás ante o misterio último do teu ser. Os crentes chamámolo Deus.
Abandónate a ese misterio con confianza. Deus paréceche inmenso e afastado. Pero, se te abres a el, sentiralo próximo. Deus está en ti sostendo a túa fraxilidade e facéndote vivir. Non é como as persoas que te queren desde fóra. Deus está no teu mesmo ser.
Segundo Karl Rahner, «esta experiencia do corazón é a única coa que se pode comprender a mensaxe de fe do Nadal: Deus fíxose home». Xa nunca estarás só. Ninguén está só. Deus está connosco. Agora sabes «algo» do Nadal. Podes celebralo, gozar e felicitalo. Podes gozar cos teus e ser máis xeneroso cos que sofren e viven tristes. Deus está contigo.
José Antonio Pagola
Tradutor: Xaquin Campo Freire
