TRAZOS DE MARÍA
A visita de María a Isabel permítelle ao evanxelista Lucas poñer en contacto ao Bautista e a Xesús incluso antes de ter nado. A escena está cargada dunha atmosfera moi especial. As dúas van ser nais. As dúas foron chamadas para colaborar no plan de Deus. Non hai varóns. Zacarías ficou mudo. Xosé está sorprendentemente ausente. As dúas mulleres ocupan toda a escena.
María que chegou á présa desde Nazaré convértese na figura central. Todo vira en torno a ela e ao seu Fillo. A súa imaxe brilla cuns trazos máis xenuínos do que moitos outros que lle foron engadidos posteriormente a partir de advocacións e títulos máis afastados do clima dos evanxeos.
- María, «a nai do meu Señor». Así o proclama Isabel a gritos e chea do Espírito Santo. É certo: para os seguidores de Xesús, María é, primeiro de nada, a Nai do noso Señor. Este é o punto de partida de toda a súa grandeza. Os primeiros cristiáns nunca separan a María de Xesús. Son inseparábeis. «Bendicida por Deus entre todas as mulleres», ela ofrécenos a Xesús, «froito bendito do seu ventre».
- María, a crente. Isabel decláraa ditosa porque «creu». María é grande non simplemente pola súa maternidade biolóxica, senón por acoller con fe a chamada de Deus a ser Nai do Salvador. Soubo escoitar a Deus; gardou a súa Palabra dentro do seu corazón; meditouna; púxoa en práctica cumprindo fielmente a súa vocación. María é Nai crente.
- María, a evanxelizadora. María ofrece a todos a salvación de Deus que acolleu no seu propio Fillo. Esa é a súa grande misión e o seu servizo. Segundo o relato, María evanxeliza non só cos seus xestos e palabras, senón porque alá onde vai leva consigo a persoa de Xesús e o seu Espírito. Isto é o esencial do acto evanxelizador.
- María, portadora de alegría. O saúdo de María contaxia a alegría que brota do seu Fillo Xesús. Ela foi a primeira en escoitar a invitación de Deus: «Alégrate… o Señor está contigo». Agora, desde unha actitude de servizo e de axuda a quen a necesitan, María irradia a Boa Noticia de Xesús, o Cristo, ao que sempre leva consigo. Ela é para a Igrexa o mellor modelo dunha evanxelización gozosa.
José Antonio Pagola
Tradutor: Xaquin Campo Freire
