ESCOITAR A VOZ DE XESÚS
Nalgúns ámbitos da Igrexa insístese máis do que nunca na necesidade dun «maxisterio eclesiástico» forte para dirixir aos fieis no medio da crise actual. Estas chamadas non logran, con todo, deter a súa crecente «depreciazón» entre amplos sectores de cristiáns.
De feito, non poucas intervencións dos bispos provocan reaccións encontradas. Uns encómianas con fervor, outros critícanas duramente, e a maioría esquéceas aos poucos días. Mentres tanto, no evanxeo recórdansenos unhas palabras de Xesús que nos interpelan a todos: «As ovellas seguen ao pastor porque coñecen a súa voz».
O primeiro e decisivo tamén hoxe é que, na Igrexa, os crentes escoitemos «a voz» de Xesús-Cristo en toda a súa orixinalidade e pureza, non o peso das tradicións nin a novidade das modas, non as «preocupacións» dos eclesiásticos nin os «gustos» dos teólogos, non os nosos intereses, medos ou acomodacións.
Isto esixe non confundir sen máis a voz de Xesús-Cristo con calquera palabra que se pronuncia na Igrexa. Non habemos dar por suposto que en toda intervención dos bispos, en toda predicación dos curas, en todo escrito dos teólogos ou en toda exposición dos catequistas se está a escoitar fielmente a voz de Xesús.
Sempre existe un risco. Que enchamos a Igrexa de escritos e cartas pastorais, de documentos e libros de teoloxía, de catequeses e predicacións, substituíndo co noso «ruído» a voz inconfundíbel de Xesús, o noso único mestre. Recordábao unha e outra vez o bispo san Agustín: «Temos un só mestre. E, baixo el, todos somos condiscípulos. Non nos constituímos en mestres polo feito de falar desde o púlpito. O verdadeiro Mestre fala desde dentro».
Temos de preguntarnos se a palabra que se escoita na Igrexa provén de Galilea e nace do Espírito do Resucitado. Isto é o decisivo, pois o maxisterio, a predicación ou a teoloxía han ser unha invitación a que todos e cada un dos crentes escoitemos de xeito fiel a voz de Cristo. Só cando un «aprende» algo de Xesús se convérte no seu seguidor.
José Antonio Pagola
Tradutor: Xaquin Campo Freire
