A NECESIDADE DUN GUÍA
Para os primeiros crentes, Xesús non é só un pastor, senón o verdadeiro e auténtico pastor. O único líder capaz de orientar e dar verdadeira vida ao ser humano. Esta fe en Xesús como verdadeiro pastor e guía adquire unha actualidade nova nunha sociedade masificada como a nosa onde as persoas corren o risco de perderen a súa propia identidade e ficaren como aparvadas ante tantas voces e reclamos.
A publicidade e os medios de comunicación social impoñen ao individuo non só a roupa que han vestiren, a bebida que han tomar ou a canción que han escoitar. Impóñensenos tamén os hábitos, os costumes, as ideas, os valores, o estilo de vida e a conduta que temos de adoptar.
Os resultados son palpábeis. Son moitas as vítimas desta «sociedade-rabuña». Persoas que viven «segundo a moda». Xentes que xa non actúan por propia iniciativa. Homes e mulleres que buscan a súa pequena felicidade, esforzándose por ter aqueles obxectos, ideas e condutas que lles ditan desde fóra.
Expostos a tantas chamadas e reclamos, corremos o risco de non escoitarmos xa a voz da propia interioridade. É triste ver ás persoas esforzándose por viviren un estilo de vida «imposto» desde fóra, que simboliza para eles o benestar e a verdadeira felicidade.
Os cristiáns creemos que só Xesús pode ser guía definitivo do ser humano. Só desde el podemos aprender a vivir. Precisamente, o cristián é aquel que, desde Xesús, vai descubrindo día a día cal é o xeito máis humano de vivir.
Seguir a Xesús como bo pastor é interiorizar as actitudes fundamentais que el viviu. É esforzarnos por vivilas hoxe desde nosa propia orixinalidade proseguindo a tarefa de construírmos o reino de Deus que el comezou.
Pero mentres a meditación sexa substituída pola televisión, o silencio interior polo ruído e o seguimento á propia conciencia pola submisión cega á moda, será difícil que escoitemos a voz do Bo Pastor, que nos pode axudar a vivirmos no medio desta «sociedade de consumo» que consome aos seus consumidores.
José Antonio Pagola
Tradutor: Xaquin Campo Freire
