CONTIDO INESGOTÁBEL
Quen se achega unha e outra vez ás benaventuranzas de Xesús advirte que o seu contido é inesgotábel. Sempre teñen resonancias novas. Sempre atopamos nelas unha luz diferente para o momento que estamos a vivir. Así «resoan» hoxe en min as palabras de Xesús.
Felices os pobres de espírito, os que saben vivir con pouco. Terán menos problemas, estarán máis atentos aos necesitados e vivirán con máis liberdade. O día en que o entendamos seremos máis humanos.
Felices os mansos, os que baleiran o seu corazón de violencia e agresividade. Son un agasallo para o noso mundo violento. Cando todos fagamos iso, poderemos convivir en verdadeira paz.
Felices os que choran ao ver sufrir a outros. Son xente boa. Con eles pódese construír un mundo máis fraterno e solidario.
Felices os que teñen fame e sede de xustiza, os que non perderon o desexo de seren máis xustos nin a vontade de faceren unha sociedade máis digna. Neles alenta o mellor do espírito humano.
Felices os misericordiosos, os que saben perdoar no fondo do seu corazón. Só Deus coñece a súa loita interior e a súa grandeza. Eles son os que mellor nos poden achegar á reconciliación.
Felices os que manteñen o seu corazón limpo de odios, enganos e intereses ambiguos. Pódese confiar neles para construír o futuro.
Felices os que traballan pola paz con paciencia e con fe. Sen desalentarse ante os obstáculos e dificultades, e buscando sempre o ben de todos. Necesitámolos para reconstruír a convivencia.
Felices os que son perseguidos por actuaren con xustiza e responder con mansedume ás inxurias e ofensas. Eles axúdannos a vencer o mal co ben.
Felices os que son insultados, perseguidos e calumniados por seguir fielmente a traxectoria de Xesús. O seu sufrimento non se perderá inutilmente.
Deformaríamos, con todo, o sentido destas benaventuranzas se non engadísemos algo que se subliña en cada unha delas. Con belas expresións Xesús pon ante os seus ollos a Deus como garante último da dita humana. Quen viva inspirándose neste programa de vida, un día «serán consolados», «quedarán saciados de xustiza», «alcanzarán misericordia», «verán a Deus» e gozarán eternamente no seu reino.
José Antonio Pagola
Tradutor: Xaquin Campo Freire
