UN ENSINAR NOVO
O episodio é sorprendente e arrepiante. Todo ocorre na «sinagoga», o lugar onde se ensina oficialmente a Lei, tal como é interpretada polos mestres autorizados. Sucede en «sábado», o día en que os xudeus observantes se reúnen para escoitaren o comentario dos seus dirixentes. É neste marco onde Xesús comeza por vez primeira a «ensinar».
Nada se di do contido das súas palabras. Non é iso o que aquí interesa, senón o impacto que produce a súa intervención. Xesús provoca asombro e admiración. A xente capta nel algo especial que non atopa nos seus mestres relixiosos: Xesús «non ensina como os escribas, senón con autoridade».
Os letrados ensinan en nome da institución. Atéñense ás tradicións. Citan unha e outra vez a mestres ilustres do pasado. A súa autoridade provén da súa función de interpretaren oficialmente a Lei. A autoridade de Xesús é diferente. Non vén da institución. Non se basea na tradición. Ten outra fonte. Está cheo do Espírito vivificador de Deus.
Van poder comprobalo de seguida. De forma inesperada, un posuído interrompe a gritos o seu ensino. Non o pode soportar. Está aterrorizado: «viñeches a acabar connosco?». Aquel home sentíase ben ao escoitar o ensino dos escribas. Por que se sente agora ameazado?
Xesús non vén destruír a ninguén. Precisamente a súa «autoridade» está en dar vida ás persoas. O seu ensino humaniza e libera de escravitudes. As súas palabras invitan a confiar en Deus. A súa mensaxe é a mellor noticia que pode escoitar aquel home atormentado interiormente. Cando Xesús o cura, a xente exclama: «este ensinar con autoridade é novo».
As sondaxes indican que a palabra da Igrexa está perdendo autoridade e credibilidade. Non basta falar de xeito autoritario para anunciar a Boa Noticia de Deus. Non é suficiente transmitir correctamente a tradición para abrir os corazóns á alegría da fe. O que necesitamos urxentemente é un ensinar novo.
Non somos «escribas», senón discípulos de Xesús. Temos de comunicar a súa mensaxe, non as nosas tradicións. Temos de ensinar curando a vida, non adoutrinando as mentes. Temos de anunciar o seu Espírito, non as nosas teoloxías.
José Antonio Pagola
Tradutor: Xaquin Campo Freire
