UNHA IGREXA MÁIS EVANXÉLICA
Ao formular as benaventuranzas, Mateu, con diferenza de Lucas, preocúpase de deseñar os trazos que han caracterizar aos seguidores de Xesús. De aí a súa importancia para nós nestes tempos nos que a Igrexa ten de ir atopando o seu propio estilo de vida no medio dunha sociedade secularizada.
Non é posíbel propor a Boa Noticia de Xesús de calquera forma. O Evanxeo só se difunde desde actitudes evanxélicas. As benaventuranzas indícannos o espírito que ha inspirar a actuación da Igrexa mentres peregrina cara ao Pai. Témolas de escoitar en actitude de conversión persoal e comunitaria. Só así camiñaremos cara ao futuro.
Ditosa a Igrexa «pobre de espírito» e de corazón sinxelo, que actúa sen prepotencia nin arrogancia, sen riquezas nin esplendor, sostida pola autoridade humilde de Xesús. Dela é o reino de Deus.
Ditosa a Igrexa que «chora» cos que choran e sofre ao ser desposuída de privilexios e poder, pois poderá compartir mellor a sorte dos perdedores e tamén o destino de Xesús. Un día será consolada por Deus.
Ditosa a Igrexa que renuncia a imporse pola forza, a coacción ou o sometemento, practicando sempre a mansedume do seu Mestre e Señor. Herdará un día a terra prometida.
Ditosa a Igrexa que ten «fame e sede de xustiza» dentro de si mesma e para o mundo enteiro, pois buscará a súa propia conversión e traballará por unha vida máis xusta e digna para todos, empezando polos últimos. O seu anhelo será saciado por Deus.
Ditosa a Igrexa compasiva que renuncia ao rigorismo e prefire a misericordia antes ca os sacrificios, pois acollerá aos pecadores e non lles ocultará a Boa Noticia de Xesús. Ela alcanzará de Deus misericordia.
Ditosa a Igrexa de «corazón limpo» e conduta transparente, que non encobre os seus pecados nin promove o segredo ou a ambigüidade, pois camiñará na verdade de Xesús. Un día verá a Deus.
Ditosa a Igrexa que «traballa pola paz» e loita contra as guerras, que une corazóns e sementa concordia, pois contaxiará a paz de Xesús que o mundo non pode dar. Ela será filla de Deus.
Ditosa a Igrexa que sofre hostilidades e persecución por mor da xustiza sen refusar o martirio, pois saberá chorar coas vítimas e coñecerá a cruz de Xesús. Dela é o reino de Deus.
A sociedade actual necesita coñecer comunidades cristiás marcadas por este espírito das benaventuranzas. Só unha Igrexa evanxélica ten autoridade e credibilidade para mostrar o rostro de Xesús aos homes e mulleres de hoxe.
José Antonio Pagola
Tradutor: Xaquin Campo Freire
