A LUZ DAS BOAS OBRAS
Os seres humanos tendemos a aparecer ante os demais como máis intelixentes, máis bos, máis nobres do que realmente somos. Pasamos a vida tratando de aparentarmos ante os demais e ante nós mesmos unha perfección que non posuímos.
Os psicólogos din que esta tendencia se debe, sobre todo, ao desexo de afirmármonos ante nós mesmos e ante os outros, para defendérmonos así da súa posíbel superioridade.
Fáltanos a verdade de «as boas obras», e enchemos a nosa vida de palabraría e de toda clase de disquisicións. Non somos capaces de darlle ao fillo un exemplo de vida digna, e pasamos os días esixíndolle o que nós mesmos non vivimos.
Non somos coherentes coa nosa fe cristiá, e tratamos de xustificarnos criticando aos que abandonaron a práctica relixiosa. Non somos testemuñas do evanxeo, e dedicámonos a predicarllo aos outros.
Talvez teñamos de comezar por recoñecermos pacientemente as nosas incoherencias, para presentar aos demais só a verdade da nosa vida. Se temos a coraxe de aceptarmos a nosa mediocridade, abrirémonos máis facilmente á acción dese Deus que pode transformar aínda a nosa vida.
Xesús fala do perigo de que «o sal se volva eslamiado». San Xoán da Cruz dío doutra maneira: «Deus vos libre que se comece a esvaecer o sal, que aínda que así pareza que fai algo por fóra, en sustancia non será nada, cando está certo que as boas obras non se poden facer senón en virtude de Deus».
Para ser «sal da terra», o importante non é o activismo, a axitación, o protagonismo superficial, senón «as boas obras» que nacen do amor e da acción do Espírito en nós.
Con que atención deberiamos escoitar hoxe na Igrexa estas palabras do mesmo Xoán da Cruz: «Advirtan, pois, aquí os que son moi activos e pensan cinguir o mundo coas súas predicacións e obras exteriores, que moito máis proveito farían á Igrexa e moito máis agradarían a Deus… se gastasen tan sequera a metade dese tempo en estaren con Deus en oración».
Pola contra, segundo o místico doutor, «todo é martelar e facer pouco máis que nada, e ás veces nada, e aínda ás veces dano». No medio de tanta actividade e axitación, onde están as nosas «boas obras»? Xesús dicía aos seus discípulos: «Alume a vosa luz aos homes para que vexan as vosas boas obras e dean gloria ao Pai».
José Antonio Pagola
Tradutor: Xaquin Campo Freire
