VIVIR NA VERDADE
DE XESÚS
Non hai na vida unha experiencia tan misteriosa e sacra como a despedida do ser querido que se nos vai máis aló da morte. Por iso o evanxeo de Xoán trata de recoller na despedida última de Xesús o seu testamento: o que non nunca han esquecer.
Unha cousa é moi clara para o evanxelista. O mundo non vai poder «ver» nin «coñecer» a verdade que se esconde en Xesús. Para moitos, Xesús pasaría por este mundo coma se nada ocorrese; non deixará rastro algún nas súas vidas. Para ver a Xesús necesítanse uns ollos novos. Só os que o amen poderán experimentaren que está vivo e fai vivir.
Xesús é a única persoa que merece ser amada de maneira absoluta. Quen o ama así non pode pensar nel coma se pertencese ao pasado. A súa vida non é un recordo. O que ama a Xesús vive as súas palabras, «garda os seus mandamentos», vaise «enchendo» de Xesús.
Non é fácil expresar esta experiencia. O evanxelista chámalle: o «Espírito da verdade». É unha expresión moi acertada, pois Xesús vaise convertendo nunha forza e unha luz que nos fai «vivir na verdade». Calquera que sexa o punto no que nos atopemos na vida, acoller en nós a Xesús lévanos cara á verdade.
Este «Espírito da verdade» non hai que confundilo cunha doutrina. Non se atopa nos libros dos teólogos nin nos documentos do maxisterio. Segundo a promesa de Xesús, «vive connosco e está en nós». Escoitámolo no noso interior e resplandece na vida de quen segue os pasos de Xesús de maneira humilde, confiada e fiel.
O evanxelista chámao «Espírito defensor», porque, agora que Xesús non está fisicamente connosco, deféndenos de canto nos podería separar del. Este Espírito «está sempre connosco». Ninguén o pode asasinar, como a Xesús. Seguirá sempre vivo no mundo. Se o acollemos na nosa vida, non nos sentiremos orfos e desamparados.
Talvez a conversión que máis necesitamos hoxe os cristiáns é ir pasando dunha adhesión verbal, rutineira e pouco real a Xesús cara á experiencia de vivirmos arraigados no seu «Espírito da verdade».
José Antonio Pagola
Tradutor: Xaquin Campo Freire
