COS CRUCIFICADOS
O mundo está cheo de igrexas cristiás presididas pola imaxe do Crucificado, e está cheo tamén de persoas que sofren crucificadas pola desgraza, as inxustizas e o esquecemento: enfermos privados de coidado, mulleres maltratadas, anciáns ignorados, nenos e nenas violados, emigrantes sen papeis nin futuro. E xente, moita xente, afundida na fame e na miseria no mundo enteiro.
É difícil imaxinar un símbolo máis cargado de esperanza que esa cruz plantada polos cristiáns en todas partes: «memoria» conmovedora dun Deus crucificado e recordo permanente da súa identificación con todos os inocentes que sofren de maneira inxusta no noso mundo.
Esa cruz, levantada entre as nosas cruces, lémbranos que Deus sofre connosco. A Deus dóelle a fame dos nenos de Calcuta, sofre cos asasinados e torturados de Iraq, chora coas mulleres maltratadas día a día no seu fogar. Non sabemos explicarnos a raíz última de tanto mal. E, aínda que o soubésemos, non nos serviría de moito. Só sabemos que Deus sofre connosco. Non estamos sós.
Pero os símbolos máis sublimes poden quedar pervertidos se non recuperamos unha e outra vez o seu verdadeiro contido. Que significa a imaxe do Crucificado, tan presente entre nós, se non vemos marcados no seu rostro o sufrimento, a soidade, a tortura e desolación de tantos fillos e fillas de Dios?
Que sentido ten levarmos unha cruz sobre o noso peito se non sabemos cargar coa máis pequena cruz de tantas persoas que sofren onda nós? Que significan os nosos bicos ao Crucificado se non espertan en nós o agarimo, a acollida e o achegamento aos que viven crucificados?
O Crucificado desenmascara como ninguén as nosas mentiras e covardías. Desde o silencio da cruz, el é o xuíz máis firme e manso do aburguesamento da nosa fe, da nosa acomodación ao benestar e a nosa indiferenza ante os que sofren. Para adorarmos o misterio dun «Deus crucificado» non basta celebrarmos a Semana Santa; é necesario ademais achegármonos máis aos crucificados, semana tras semana.
José Antonio Pagola
Tradutor: Xaquin Campo Freire
