O MELLOR AMIGO
No núcleo da fe cristiá nun Deus trinitario hai unha afirmación esencial. Deus non é un ser tenebroso e impenetrábel, encerrado egoistamente en si mesmo. Deus é Amor e só Amor. Os cristiáns cremos que no Misterio último da realidade, dando sentido e consistencia a todo, non hai senón Amor. Xesús non escribiu ningún tratado de Deus. En ningún momento o atopamos expondo aos campesiños de Galilea doutrina sobre del. Para Xesús, Deus non é un concepto, unha bela teoría, unha definición sublime. Deus é o mellor Amigo do ser humano.
Os investigadores non dubidan dun dato que recollen os Evanxeos. A xente que escoitaban a Xesús falar de Deus e o vían actuar no seu nome experimentaba a Deus como unha Boa Noticia. O que Xesús di de Deus resúltalles algo novo e bo. A experiencia que comunica e contaxia parécelles a mellor noticia que poden escoitaren de Deus. Por que?
Talvez o primeiro que captan é que Deus é de todos, non só dos que se senten dignos para presentárense ante el no Templo. Deus non está atado a un lugar sagrado. Non pertence a unha relixión. Non é propiedade dos piadosos que peregrinan a Xerusalén. Segundo Xesús, «fai saír o seu sol sobre bos e maos». Deus non exclúe nin discrimina a ninguén. Xesús invita a todos a confiaren nel: «Cando oredes, dicide: ¡Pai!».
Con Xesús van descubrindo que Deus non é só dos que se achegan a el cargados de méritos. Antes ca eles escoita a quen lle piden compaixón, porque se senten pecadores sen remedio. Segundo Xesús, Deus anda sempre buscando aos que viven perdidos. Por iso se sente tan amigo de pecadores. Por iso lles di que el «veu buscar e salvar o que estaba perdido».
Tamén se dan conta de que Deus non é só dos sabios e entendidos. Xesús dálle grazas ao Pai porque lle gusta revelarlles aos pequenos cousas que fican ocultas aos ilustrados. Deus ten menos problemas para entenderse co pobo sinxelo que cos doutos que creen sabelo todo.
Pero foi sen dúbida a vida de Xesús, dedicado en nome de Deus a aliviar o sufrimento dos enfermos, liberar a posuídos por espíritos malignos, rescatar a leprosos da marxinación, ofrecer o perdón a pecadores e prostitutas…, o que lles convenceu de que Xesús experimentaba a Deus como o mellor Amigo do ser humano, que só busca o noso ben e só se opón a quen nos fai dano. Os seguidores de Xesús nunca puxeron en dúbida que o Deus encarnado e revelado en Xesús é Amor e só Amor cara a todos.
José Antonio Pagola
Tradutor: Xaquin Campo Freire
