XESÚS BAUTIZA CON ESPÍRITO SANTO
O Bautista representa coma poucos o esforzo dos homes e mulleres de todos os tempos por purificárense, reorientaren a súa existencia e comezar unha vida máis digna. Esta é a súa mensaxe: «Facer penitencia, volver ao bo camiño, poñamos orde na nosa vida». Isto é tamén o que escoitamos máis dunha vez no fondo da conciencia: «Debo cambiar, teño de ser mellor, hei actuar de maneira máis digna».
Esta vontade de purificación é nobre e indispensábel, pero non abonda. Esforzámonos por corrixir erros, tratamos de cumprirmos co noso deber con máis responsabilidade, tentamos facer mellor as cousas, pero realmente nada novo esperta en nós nada apaixonante. Ben axiña o paso do tempo nos devolve á mediocridade de sempre. O mesmo Bautista recoñece o límite do seu esforzo: «Eu bautízovos só con auga; alguén máis forte bautizaravos con Espírito e lume».
O bautismo de Xesús encerra unha mensaxe nova que supera radicalmente ao Bautista. Os evanxelistas coidaron con esmero a escena. O ceo, que permanecía pechado e impenetrábel, ábrese agora para mostrar o seu segredo. Ao abrirse, non descarga a ira divina que anunciaba o Bautista, senón que regala o amor de Deus, o Espírito, que pousa pacificamente sobre Xesús. E escóitase unha voz do ceo: «Ti es o meu Fillo amado».
A mensaxe é clara: con Cristo, o ceo fica aberto; de Deus só brota amor e paz; podemos vivir con confianza. A pesar dos nosos erros e da nosa mediocridade insoportábel, tamén para nós «o ceo quedou aberto». Tamén nós podemos escoitar con Xesús a voz de Deus: «Ti es para min un fillo amado, unha filla amada». En diante podemos afrontar a vida non coma unha «historia sucia» que habemos purificar constantemente, senón coma o agasallo da «dignidade de fillos de Deus», que habemos coidar con gozo e agradecemento.
Para quen vive desta fe, a vida está chea de momentos de graza: o nacemento dun fillo, o contacto cunha persoa boa, a experiencia dun amor limpo… que poñen na nosa vida unha luz e unha calor novos. De súpeto parécenos ver «o ceo aberto». Algo novo comeza en nós; sentímonos vivos; espértase o mellor que hai no noso corazón. O que talvez soñáramos xa secretamente regálasenos agora de forma inesperada: un inicio novo, unha purificación diferente, un «bautismo de Espírito». Detrás desas experiencias está Deus amándonos como Pai. Está o seu Amor e o seu Espírito «dador de vida».
José Antonio Pagola
Tradutor: Xaquin Campo Freire
