MATAR OU ADORAR
Herodes e a súa corte representan o mundo dos poderosos. Todo vale nese mundo con tal de asegurar o propio poder: o cálculo, a estratexia e a mentira. Vale ata a crueldade, o terror, o desprezo ao ser humano e a destrución de inocentes. Parece un mundo grande e poderoso, preséntasenos como defensor da orde e a xustiza, pero é débil e mesquiño, pois termina sempre buscando ao neno «para matalo».
Segundo o relato de Mateu, uns magos vindos de Oriente irrompen neste mundo de tebras. Algúns eséxetas interpretan hoxe a lenda evanxélica acudindo á psicoloxía do profundo. Os magos representan o camiño que seguen quen escoitan os anhelos máis nobres do corazón humano; a estrela que os guía é a nostalxia do divino; o camiño que percorren é o desexo. Para descubrir o divino no humano, para adorar ao neno no canto de buscar a súa morte, para recoñecer a dignidade do ser humano no canto de destruíla, hai que percorrer un camiño oposto ao que segue Herodes.
Non é un camiño fácil. Non abonda con escoitarmos a chamada do corazón; hai que poñerse en marcha, exporse, correr riscos. O xesto final dos magos é sublime. Non matan ao neno, senón que o adoran. Inclínanse respectuosamente ante a súa dignidade; descobren o divino no humano. Esta é a mensaxe da súa adoración ao Fillo de Deus encarnado no neno de Belén.
Podemos albiscar tamén o significado simbólico dos agasallos que lle ofrecen. Co ouro recoñecen a dignidade e o valor inestimábel do ser humano: todo ha quedar subordinado á súa felicidade; un neno merece que se poñan aos seus pés todas as riquezas do mundo. O incenso recolle o desexo de que a vida dese neno se despregue e a súa dignidade se eleve ata o ceo: todo ser humano está chamado a participar da vida mesma de Deus. A mirra é medicina para curar a enfermidade e aliviar o sufrimento: o ser humano necesita de coidados e consolo, non de violencia e agresións.
Coa súa atención ao débil e a súa tenrura cara ao humillado, este Neno nado en Belén introducirá no mundo a maxia do amor, única forza de salvación que xa desde agora fai tremer ao poderoso Herodes.
José Antonio Pagola
Tradutor: Xaquin Campo Freire
