O DEUS ENCARNADO
O Nadal obríganos a revisarmos as ideas e imaxes que habitualmente temos de Deus, pero que nos impiden achegármonos ao seu verdadeiro rostro. Deus non se deixa apreixar polos nosos esquemas ou moldes de pensamento. Non segue os camiños que nós lle marcamos. Deus é imprevisíbel.
Imaxinámolo forte e poderoso, maxestoso e omnipotente, pero el ofrécesenos na fraxilidade dun neno débil, nacido na máis absoluta sinxeleza e pobreza. Colocámolo case sempre no extraordinario, no prodixioso e sorprendente, pero el preséntasenos no cotián, no normal e ordinario. Imaxinámolo grande e afastado, e el fáísenos pequeno e próximo.
Non. Este Deus encarnado no neno de Belén non é o que nós esperamos. Non está á altura do que nós imaxinamos. Este Deus pódenos decepcionar. Porén, non é precisamente este Deus próximo o que necesitamos cabo de nós? Non é esta proximidade ao humano a que mellor revela o verdadeiro misterio de Deus? Non se manifesta na debilidade deste neno a súa verdadeira grandeza?
O Nadal recórdanos que a presenza de Deus non responde sempre ás nosas expectativas, pois ofrecésenos onde nós menos o esperamos. Certamente habemos buscalo na oración e no silencio, na superación do egoísmo, na vida fiel e obediente á súa vontade, pero Deus pódesenos ofrecer cando quere e como quere, ata no máis ordinario e común da vida.
Agora sabemos que o podemos atopar en calquera ser indefenso e débil que necesita da nosa acollida. Pode estar nas bágoas dun neno ou na soidade dun ancián. No rostro de calquera irmán podemos descubrir a presenza dese Deus que quixo encarnarse no humano.
Esta é a fe revolucionaria do Nadal, o escándalo máis grande do cristianismo, expresado de xeito lapidario por Paulo: «Cristo, malia a súa condición divina, non se aferrou á súa categoría de Deus; ao contrario, desposuíse do seu rango e tomou a condición de servo, facéndose un de tantos e presentándose coma un simple home» (Filipenses 2,6-7).
O Deus cristián non é un Deus des-encarnado, afastado e inaccesíbel. É un Deus encarnado; próximo, próximo! Un Deus ao que podemos tocar dalgún xeito sempre que tocamos o humano.
José Antonio Pagola
Tradutor: Xaquin Campo Freire
