DEUS TEN A ÚLTIMA PALABRA
A resurrección de Xesús non é só unha celebración litúrxica. É, primeiriño de todo, a manifestación do amor poderoso de Deus, que nos salva da morte e do pecado. É posíbel experimentar hoxe a súa forza vivificadora?
O primeiro é tomar conciencia de que a vida está habitada por un Misterio acolledor que Xesús chama «Pai». No mundo hai tal «exceso» de sufrimento que a vida pódenos parecer algo caótico e absurdo. Non é así. Aínda que ás veces non sexa fácil experimentalo, a nosa existencia está sostida e dirixida por Deus cara a unha plenitude final.
Isto habémolo de empezar a vivir desde o noso propio ser: eu son amado por Deus; a min espérame unha plenitude sen fin. Hai tantas frustracións na nosa vida, querémonos ás veces tan pouco, desprezámonos tanto, que afogamos en nós a alegría de vivir. Deus resucitador pode espertar de novo a nosa confianza e o noso gozo.
Non é a morte que ten a última palabra, senón Deus. Hai tanta morte inxusta, tanta enfermidade dolorosa, tanta vida sen sentido, que poderiamos afundirnos na desesperanza. A resurrección de Xesús recórdanos que Deus existe e salva. El faranos coñecer a vida plena que aquí non coñecemos.
Celebrar a resurrección de Xesús é abrírmonos á enerxía vivificadora de Deus. O verdadeiro inimigo da vida non é o sufrimento, senón a tristeza. Fáltanos paixón pola vida e compaixón polos que sofren. E sóbranos apatía e hedonismo barato que nos fan vivir sen gozar o mellor da existencia: o amor. A resurrección pode ser fonte e estímulo de vida nova.
José Antonio Pagola
Tradutor: Xaquin Campo Freire
