CRER NO RESUCITADO
Os cristiáns non habemos esquecer que a fe en Xesús Cristo resucitado é moito máis do que o asentimento a unha fórmula do credo. Mesmo moito máis cá afirmación de algo extraordinario que lle aconteceu ao morto Xesús, hai aproximadamente dous mil anos.
Crer no Resucitado é crer que agora Cristo está vivo, cheo de forza e creatividade, impulsando a vida cara ao seu último destino e liberando á humanidade de caer no caos definitivo.
Crer no Resucitado é crer que Xesús se fai presente no medio dos crentes. É tomar parte activa nos encontros e tarefas da comunidade cristiá, sabendo con gozo que, cando dous ou tres nos reunimos no seu nome, alí está el pondo esperanza nas nosas vidas.
Crer no Resucitado é descubrirmos que a nosa oración a Cristo non é un monólogo baleiro, sen interlocutor que escoite a nosa invocación, senón diálogo con alguén vivo que está cabo de nós na mesma raíz da vida.
Crer no Resucitado é deixármonos interpelar pola súa palabra viva recollida nos evanxeos, e irmos descubrindo practicamente que as súas palabras son «espírito e vida» para quen sabe alimentarse delas.
Crer no Resucitado é vivirmos a experiencia persoal de que Xesús ten forza para cambiar as nosas vidas, resucitar o bo que hai en nós e irnos liberando do que mata a nosa liberdade.
Crer no Resucitado é saber descubrilo vivo no último e máis pequeno dos irmáns, chamándonos á compaixón e á solidariedade.
Crer no Resucitado é crer que el é «o primoxénito de entre os mortos», no que se inicia xa a nosa resurrección e no que se nos abre xa a posibilidade de vivirmos eternamente.
Crer no Resucitado é crer que nin o sufrimento, nin a inxustiza, nin o cancro, nin o infarto, nin a metralleta, nin a opresión, nin a morte teñen a última palabra. Só o Resucitado é Señor da vida e da morte.
José Antonio Pagola
Tradutor: Xaquin Campo Freire
