XESÚS TIÑA RAZÓN
Que sentimos os seguidores de Xesús cando nos atrevemos a crer de verdade que Deus resucitou a Xesús? Que vivimos mentres seguimos camiñando tralos seus pasos? Como nos comunicamos con el cando o experimentamos cheo de vida?
Xesús resucitado, tiñas razón.
É verdade canto nos dixeches de Deus. Agora sabemos que El é un Pai fiel, digno de toda confianza. Un Deus que nos ama máis aló da morte. Seguirémoslle chamando «Pai» con máis fe do que nunca, como ti nos ensinaches. Sabemos que El non nos defraudará.
Xesús resucitado, tiñas razón.
Agora sabemos que Deus é amigo da vida. Agora empezamos a entendermos mellor a túa paixón por unha vida máis sa, xusta e ditosa para todos. Agora comprendemos por que antepoñías a saúde dos enfermos a calquera lei ou tradición relixiosa. Seguindo os teus pasos, viviremos curando a vida e aliviando o sufrimento. Poñeremos sempre a relixión ao servizo das persoas.
Xesús resucitado, tiñas razón.
Agora sabemos que Deus faille xustiza ás vítimas inocentes: fai triunfar a vida sobre a morte, o ben sobre o mal, a verdade sobre a mentira, o amor sobre o odio. Seguiremos loitando contra do mal, a mentira e os abusos. Buscaremos sempre o reino dese Deus e a súa xustiza. Sabemos que iso é o primeiro que o Pai quere de nós.
Xesús resucitado, tiñas razón.
Agora sabemos que Deus se identifica cos crucificados. Nunca endexamais cos verdugos. Empezamos a entender por que estabas sempre cos doentes e por que defendías tanto aos pobres, os famentos e desprezados. Defenderemos aos máis débiles e vulnerábeis, aos maltratados pola sociedade e esquecidos pola relixión. E en diante escoitaremos mellor a túa chamada a sermos compasivos como o Pai do ceo é compasivo.
Xesús resucitado, tiñas razón.
Agora empezamos a entender un pouco as túas palabras máis duras e estrañas. Comezamos a intuírmos que quen perda a súa vida por ti e polo teu evanxeo vaina a salvar. Agora comprendemos por que nos invitas a seguirte ata o final cargando cada día coa cruz. Seguiremos sufrindo un pouco por ti e polo teu evanxeo, pero ben axiña compartiremos contigo o abrazo do Pai.
Xesús resucitado, tiñas razón.
Agora estás vivo para sempre e faste presente no medio de nós cando nos reunimos dous ou tres no teu nome. Agora sabemos que non estamos sos, que ti nos acompañas mentres camiñamos cara ao Pai. Escoitaremos a túa voz cando leamos o teu evanxeo. Alimentarémonos de ti cando celebremos a túa cea. Estarás connosco ata o final dos tempos.
José Antonio Pagola
Tradutor: Xaquin Campo Freire
